Covalima, 20/06/2024, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, akompaña Diretór Enjeñaria no Investimentu (DEI) no Koordenadór BTL, E.P Munisípiu Covalima ho ekipa, hala’o enkontru ho Autoridade Postu-Administrativu (APA) Fatululik, Komandante PNTL Eskuadra Fatululik, inklui lideransa komunitária sira, iha salaun sala enkontru Administrsaun Postu Fatululik.
Sorumutu ne’e, hodi halo koordenasaun no husu ba Autoridade Postu, Lideransa komunitaria no parte seguransa atu nafatin koopera ho BTL, E.P hodi dezenvolve setór bee no saneamentu, iha postu administrativu Fatululik.
Hafoin remata enkontru ne’e, Ekipa BTL, E.P ne’ebé lidera hosi Ezekutivu BTL, E.P kontinua monitoriza projetu konstrusaun fornesimentu sistema bee moos, ne’ebé implementa hela iha postu administrativu Fatululik.
Atividade monitorizasaun ne’e, hodi observa direta obra fíziku ne'ebé la'o hela iha terrenu no atu hatene progresu servisu ne'e rasik nomos hodi garante kualidade projetu refere, nune'e wainhira finaliza, bele fó benefísiu ba populasaun sira to’o tempu naruk.
Durante atividade monitorizasaun iha terrenu, Ezekutivu BTL, E.P husu ba kompañia implementadór atu aselera lalais projetu fíziku, nune'e bele responde ona ba populasaun sira nia preokupasaun kona-bá problema falta bee moos.
Enkuantu projetu konstrusaun sistema bee moos ne'e, implementa hosi kompañia Laviana Dezes Unip Lda ho totál kustu $ 460,827.38. Projetu refere wainhira finaliza sei instala mos metru kontadór unidade 237 ba uma kian sira no sei benefisia ba populasaun 1.422 inklui suku Taroman no suku Fatululik.
Share on Social Media:
