Díli, 29/01/2025. Prezidente Komisaun Ezekutiva (KE) Bee Timor-Leste Empreza Públika (BTL, E.P), Sr. Gustavo da Cruz, partispa iha programa Talk Show, ho tópiku “Esforsu sira ba Garante Fornesimentu Bee Moos no Saneamentu iha Timor-Leste”. Programa ne’e organiza hosi Plataforma Nasionál Bee, Saneamentu no Ijiene Timor-Leste (PN-BESI-TL) no realiza iha stúdiu RTTL, E.P, Caicoli.
Objetivu hosi realizasaun programa talk show ne’e, hodi deskute kle’an entre parte relevante sira ne’ebé servisu ba bee moos no saneamentu nian, hodi tau hanoin hamutuk buka solusaun liga ba polítika ne’ebé integradu hodi dezenvolve setór bee no saneamentu iha Timor-Leste, nune’e bele atinji meta ne’ebé sita iha PEDN 2011-2030 katak to’o tinan 2030, populasaun hotu bele asesu ona bee moos no saneamentu ne’ebé adekuadu.
Iha diskusaun ne'e, Prezidente K.E BTL, E.P esplika papel esensiál empreza públika nian nomos atinjimentu, obstákulu no esforsu ba oin hodi implementa planu importante sira, oinsá atu liberta povu hosi ki’ak no mukit liuhosi setór bee no saneamentu, katak hodi lori nesedade bázika bee moos no saneamentu hakbesik ba komunidade iha territóriu nasionál.
BTL, E.P nudár setór vital, nune’e presiza tebes atu investe iha setór ida ne’e, maibé presiza haree mos ba rekursu bee ne’ebé adekuadu no prepara estudu ida ne’ebé di’ak no kle’an, ho nune’e estudu preparadu no di’ak ona, bele kontinua halo investimentu iha setór ida ne’e ho di’ak. Tanba ne’e, BTL, E.P prepara ona estudu sira no daudaun ne’e, esforsu hela hodi bele implementa, tantu bee nomos saneamentu. Ida ne’e la signifika fokus de’it ba iha área urbana, maibé tau mos atensaun ba iha área rurál sira.
Oradór iha programa Talk Show ne’e, hosi DNRAS, Diresaun-Jerál Desentralizasaun no Governu Lokál-MAE, BTL, E.P no PN-BESI-TL rasik.
Share on Social Media:
