Lautém, 14/06/2024, Prezidente Komisaun Ezekutiva BTL, E.P, Eng. Carlos Peloi dos Reis, partisipa iha serimónia Lansamentu ba sistema bee moos, ne’ebé sei kanaliza ba komunidade sira, iha Aldeia Soleresi, Suku Maina I, Munisípiu Lautém.
Projetu reabilitasaun sistema bee moos ne’e, hetan apoia finanseiru husi parseiru Ajensia Internasional Engimeers without borders Australia, hodi responde ba komunidade sira iha Aldeia Soleresi nia ejijensia, ne’ebé tinan barak hasoru preokupasaun liu-liu liga ba bee moos.
Maibé ho ejijensia ne’e, Governu no liu husi BTL, E.P halo koperasaun di’ak ho ajensia internasional sira, hodi fo asistensia ba komunidade sira, kona-bá problema sosiál, liga ba populasaun nia nesesidade loron-loron.
Kordenadora Engimeers without borders Australia, agradese ba parseiru sira seluk nia koperasaun tomak hodi bele too ona faze impleentasaun projetu ida ne’e. Alem de ne’e mos Kordenadora ne’e afirma katak husu ba parte BTL, E.P no autoridade lokál sira nia apoia no kontribuisaun iha parte relevante sira, hodi bele finaliza projetu ida ne’e, tuir tarjeitu ne’ebé iha ona.
Iha fatin hanesan Prezidente Komisaun Ezekutiva BTL, E.P, Eng. Carlos Peloi dois Reis, agredese ba parseiru ajensia internasionál, ne’ebé iha interese hodi ajuda governu Timor-Leste, liu-liu foka liu ba bee no saneamentu iha territóriu nasional. Ho prejensa husi parseiru sira ne’e, bele ajuda BTL, E.P hodi hakmaan ona populasaun sira nia sofrementu ba bee moos, tamba dala barak bee sistema la di’ak, inan no oan sira obrigadu tenki la’o dook maka bele kuru bee, hodi utiliza ba nesesidade uma laran.
Ezekutivu ne’e husu ba autoridade lokál no komunidade sira atu kopera durante servisu ne’e la’o iha terrenu, nune’e projetu ida ne’e bele remata lalais tuir tempu, ne’ebé estabele ona. Superior BTL, E.P ne’e mos salienta katak, wainhira projetu ne’e remata, komunidade sira tenki tau matan ba sistema ida ne’e, hodi bele garante nafatin nia sustentabilidade ba longu prazu nian.
Reprezentante Autoridade lokál mos senti onra tebes, tamba governu nia esforsu bele halo kopersaun di’ak ho ajensia internasional sira, bele dada bee ba komunidade sira. Tamba ne’e parte autoridade lokál iha komprimitidu hamutuk h onia abitante sira, kontribui hodi nune’e prosesu implementasaun projetu ida ne’e hatudu rezultadu pozitivu.
Share on Social Media:
