Díli, 21/03/2025. Prezidente Komisaun Ezekutiva (KE) Bee Timor-Leste Empreza Públika (BTL, E.P), Sr. Gustavo da Cruz ho ekipa zona 11, partispa iha selebrasaun Loron Mundiál Bee nian, ne’ebé organiza hosi DNRAS-GREAS/ MOP ho tema globál “Glacier Preservation” no tema nasionál “Konserva Bee hodi Haburas Ekosistema”. Seremónia ne’e realiza iha aldeia Sukaer-Laran, Hera, postu-administrativu Cristo Rei.
Iha ámbitu selebrasaun Loron Mundiál Bee nian ne’e, S.E Ministru Obras Públikas (MOP), Sr. Samuel Marçal hatete komemorasaun loron ohin ne’e importante, tanba atu fó hanoin ba hotu-hotu, la’os de’it ba Ministériu Obras Públikas (MOP), maibé ba parte hotu no komunidade tomak, atu halo reflesaun kona-bá importánsia bee ba ita ema moris ne’e oinsa. Tanba buat hotu-hotu bele halo, maibé bee labele halo, maibé só bele tau matan, nune’e bee labele maran iha futuru.
S.E MOP akresenta, bee importante tebes, tanba bee mak fó moris no fó saúde ba ema, ho nune’e bee sai hanesan preokupasaun ida la’os de’it iha TL, maibé iha nasaun tomak iha mundu, bee sai kestaun ida importante, atu ema hotu-hotu tenke kuida bee no prezerva bee, ho nune’e labele falta iha futuru.
S.E MOP hatete, MOP liuhosi BTL, E.P no DNRAS halo hela esforsu atu solusiona problema bee moos iha TL. ba parte BTL, E.P nian mak oinsá bele jere didi’ak rekursu bee ne’ebé mak eziste, atu bee ne’e bele to’o ba komunidade hotu-hotu no sira bele hetan/asesu bee. Enkuantu DNRAS nia parte mak atu estudu kona-bá oinsá mak rekursu bee hirak ne’ebé iha, atu bele utiliza no labele estraga bee inklui kuda bee ou halo konservasaun ba bee, ida ne’e mak sira-nia esforsu ne’ebé iha hela prosesu, hein katak tinan hirak ba oin mai bele realiza buat ruma iha nasaun TL.
Membru Governu ne’e mos agradese ba parseiru Unicef, tanba parseiru nia prezensa iha Timor-Leste ne’e, sempre fó apoiu hodi haree ba kestaun bee.
Iha biban ne’e, liuhosi entrevista, Prezidente BTL, E.P husu ba komunidade sira ne’ebé hela besik iha bee matan sira, atu kuida bee, labele tesi ai arbiru, maibé di’ak liu atu kuda ai sira ne’ebé mak bele hamoris bee, atu nune’e rekursu bee sira mantein no aumenta volume bee, hodi sustenta rasik ema nia moris lor-loron.
Liga ba esforsu BTL, E.P nian atu solusiona problema bee moos iha territóriu nasionál, Ezekutivu ne’e esplika problema bee iha TL la’os problea kiik, maibé haree fila-fali ba Planu Estatejia Dezenvolvimentu Nasionál 2011-2030 nian no BTL, E.P mos iha ninia planu negósiu rasik no oras ne’e BTL, E.P halo hela intervensaun ba kapitál postu-administrativu sira ne’ebé for a hosi kapitál munisípiu, daudaun ne’e, BTL, E.P implementa ona projetu melloramentu no konstrusaun sistema bee moos ba PA hamutuk 25ne’ebé la’o hela iha terrenu, kuaze projetu neen mak finaliza ona, hein katak ba oin, wainhira governu tau tan investimentu, BTL, E,P sei bele kontinua implementa tan iha kapitál munisípiu sira hanesan Lautém no Manufahi tuir planu sei implementa iha tinan ne’e nomos sei abranje ba munisípiu Viqueque, Baucau no Díli inklui munisípiu neen seluk ne’ebé daudaun ne’e iha hela prosesu atu ba faze DED nian.
Iha ámbitu selebrasaun Loron Mundiál Bee nian, iha mos asina planu anuál ba tinan 2025 nian entre MOP ho Unicef, atu servisu hamutuk hodi konserva bee no servisu sira seluk ne’ebé liga setór bee nian. Alen de ne’e, iha mos atividade kuda ai-oan iha aldeia Sukaer-Laran, Hera no vizita fatin konstrusaun check dam uza materiál naturál nomos atividade sira seluk ne’ebé antes ne’e realiza ona hanesan semináriu no Talk Show.
Entidade ne’ebé partisipa iha selebrasaun Loron Mundiál Bee nian ne’e, hosi parseiru nasionál no internasionál, empreza públika no institute públiku inklui Diresaun sira ne’ebé tutela iha MOP, populasaun aldeia Sukaer-Laran, parte igreja, estudante sira nomos konvidadu sira seluk.
Share on Social Media:
