Díli, 09/10/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz enkontru ho parseiru WaterAid, iha Prezidente nia knaar fatin BTL, E.P, Caicoli.
Sorumutu ne’e, hodi konsulta kona-bá planu estratejia WaterAid nian, ne’ebé daudaun ne’e iha hela faze ba revizaun nian. Tanba ne’e, nudár parseiru, WaterAid hakarak halo konsultasaun ho parte relevante sira inklui BTL, E.P, nune’e bele hetan feedback hosi parte hotu-hotu, hodi bele finaliza planu referidu. Tanba iha mudansa balun iha nível internasionál nian, iha ne’ebé sira koloka setór BESI sai prioridade daruak no alterasaun klimátika mak sai prioridade dahuluk, enkuantu antes ne’e, BESI ou Wash mak sai prioridade liu iha sira-nia planu estratejia.
Ho nune’e, Ezekutivu BTL, E.P enkoraja atu mantein setór BESI ou programa Wash mak sai prioridade dahuluk iha planu estratejia WaterAid nian, ho razaun iha Timor-Leste (TL) setór BESI/Wash seidauk atinji metas ne’ebé mak iha no razaun daruak nian, mak mudansa klimátika ne’ebé akontese iha TL ne’e, impaktu hosi nasaun boot sira-nia aktu. Tanba ne’e rekomenda atu nafatin prioritiza BESI iha planu estratejia ne’e no tuir mak alterasaun klimátika, tanba BTL, E.P konsidera populasaun iha TL sei nafatin halerik ba bee, saneamentu no ijiéne.
Durante iha diskusaun ne’e, parte WaterAid hakarak hatene mos atinjimentu BTL, E.P nian durante ne’e, ho nune’e Prezidente BTL, E.P partilla informasaun liga ba progresu implementasaun projetu sira, servisu operasaun no manutensaun nian, inklui arrekasaun reseita.
Parseiru WaterAid apresia tebes ho progresu BTL, E.P nian no husu mos estratejia BTL, E.P nian, Ezekutivu esplika BT, E.P nia objetivu mak oinsá atu liberta povu hosi ki’ak no mukit iha setór BESI nian. Ho informasaun ne’ebé Prezidente BTL, E.P partilla, atu parseiru sira bele ajusta iha planu, wainhira BTL, E.P halo investimentu bee iha kapitál postu-administrativu nian, parseiru sira bele apoia investe iha suku sira ne’ebé besik iha postu-administrativu ou área rurál sira. Atu nune’e, bele atinji objetivu ida katak, liberta povu iha postu la’os de’it iha kapitál nian, maibé to’o iha suku no aldeia sira ne’ebé besik iha kapitál postu sira, atu nune'e labele iha servisu ne'ebé iha fatin ne'ebé hanesan.
Tanba iha periódu sira liu ba, servisu barak ne’ebé mak governu no parseiru sira halo, ho orsamentu ne’ebé boot, maibé no finál laiha rezultadu signifikativu. Ho nune’e, planu estratejia sira presiza la’o tuir faze por faze, katak hahú liberta hosi kapitál munisípiu ba kapitál postu-administrativu hafoin ba suku no aldeia sira.
Share on Social Media:
