Díli, 27/01/2023, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, enkontru ho ekipa Mercy Corps, liuhosi Projetu Inisiativa Rezilénsia Urbana Maloa nian. enkontru ne’e hala’o iha Prezidente nia knaar fatin, edifísiu sentrál BTL, E.P, Caicoli.
Objetivu hosi reuniaun ne’e, hodi ko’alia kona-bá projetu perfurasaun bee moos ne’ebé parseiru Mercy Corps rasik mak ezekuta no daudaun ne’e finaliza ona, iha aldeia Buka Fini, suku Bairo-Pité, postu-administrativu Dom Aleixo, munisípiu Díli nomos planu ba programa handover ou entrega fasilidade refere ba BTL, E.P. Nune’e BTL, E.P bele asegura no halo jestaun ba utilizasaun ekipamentu refere, inklui halo manutensaun ne’ebé di’ak ba obra ne’e.
Enkuantu Perfurasaun sistema Bee Moos, iha aldeia Buka Fini ne’e, finaliza ona no iha tempu badak Mercy Corps sei entrega ofisialmente ba BTL, E.P, nune’e BTL, E.P sei kontinua hakat ba faze kanalizasaun nian, hanesan monta ou instala tan tanke rezervatóriu hodi akumula bee hosi perfurasaun ne’ebé finaliza ona ne’e, nune’e hodi distribui ba komunidade sira no sei instala mos metru kontadór bee ba uma kain sira, iha área refere.
Durante iha enkontru ne’e, alende ko’alia kona-bá handover ba projetu perfurasaun bee moos ne’e, Mercy Corps atualiza mos informasaun kona-bá projetu Maloa ne’ebé implementa rasik hosi Mercy Corps, liu-liu iha área kaptasaun Maloa nian.
Share on Social Media:
