Díli, 18/08/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz enkontru ho delegasaun membru WaterAid hosi kompañia 10 hanesan, kompañia Eire Constructions Pty Ldt, Headwater Consulting, Interflow Pty Limited, Xylem, Abergeldie, Steel Mains, Sequana, Yarra Valley Water, Fulton Hogan no Clear Bridge Investments, iha sala reuniaun BTL, E.P, Caicoli.
Enkontru ne’e, ekipa hosi WaterAid hakarak atu hatene kona-bá experiénsia ba estabelesimentu BTL, E.P, progresu dezenvolvimentu BTL, E.P nian no esforsu sira hodi dezenvolve sistema bee iha kapitál postu-administrativu sira, durante periodu ida ho balun nomos dezafiu sira ne’ebé empreza ne’e enfrenta durante ezisténsia, hanesan rekursu sira, alterasaun klimátika no alternativu saida mak BTL, E.P uza hosi responde ba situasaun hirak ne’e.
Iha biban ne’e, destake mos kona-bá tipu reseitas entre kliente doméstika, komersiál no publiku sira no mekanizmu ou prosesu oinsá ba kontribuisaun reseitas hosi kliente sira.
Alen de ne’e, énfaze rekursu umanu liu-liu ba espesialista sira ne’ebé atu halo operasaun no manutensaun iha estasaun tratamentu bee nian. Ezekutivu hatete BTL, E.P laiha espesialista ne’ebé barak, maibé rekruta enjeñeiru sira no sira tuir treinamentu no kapasitasaun kurtu prazu, nune’e sira iha kapasidade no koñesimentu naton, atu halo operasaun no manutensaun iha ETA sira.
Sita mos ba kualidade bee, Prezidente BTL, E.P esplika iha estasaun tratamentu sira liu husi kontrolu laboratóriu ne’ebé rigorozu, maibé wainhira distribui ona no liuhosi liña distribuisaun sira ne’ebé antigu no kuak barak, bele akontese kontaminasaun fali iha dalan, nune’e labele garante atu hemu. Maibé iha futuru, implementa ona investimento boot iha Kapitál Nasaun no Kapitál Munisípiu sira, BTL, E.P sei garante katak bee bele hemu direta iha torneira.
Delegasaun ne’e orgullu ho susesu ne’ebé iha, maske kapasidade ba iha área espesialidade ne’e la máximu, maibé sira akompaña no observa katak BTL, E.P bele dezenvolve setór bee no iha mudansa signifikativu durante tinan lima nia laran, nune’e sira hakarak hetan experiénsia hosi BTL, E.P.
Share on Social Media:
