Díli, 30/07/2024, Prezidente Komisaun Ezekutiva BTL, E.P, Eng. Carlos Peloi dos Reis, akompaña Diretór DEI, BTL, E.P no Engeñeiru BTL, E.P, partisipa iha díalogu nasionál, entre governu no autoridade lokál, ne’ebé hala’o iha Salaun FONTIL, Caicoli.
Diálogu nasionál ne’e, organiza hosi PN-BESI-TL, atu bele halo diskusaun ba problema setór bee, saneamentu no ijiene, ba komunidade sira iha territóriu nasionál.
Iha diálogu ne’e, autoridade lokál sira, levanta preokupasaun komunidade sira nian, liga ba bee moos, ne’ebé populasaun balun iha área remota, seidauk asesu bee. Hosi oportunidade ne’, Xefe Suku sira hato’o ba parte relevante, ne’ebé tau matan ba setór ida ne’e, bele konsidera ka halo intervensaun ruma, hodi nune’e komunidade sira labele kontinua halerik ba bee.
Nune’e mos autoridade lokál sira husu ba governu, wainhira kanaliza bee, sistema funsiona, tenki fo konfiansa ka entrega ba autoridade lokál hamutuk ho komunidade sira, bele jere rasik sistema ida ne’e, nune’e governu bele tau matan fali mos ba komunidade sira iha suku no aldeia sira seluk.
Iha diálogu ne’e, Prezidente KE BTL, E.P informa, realsiona ho komunidade sira nia preokupasaun kona-bá bee moos ne’e maka BTL, E.P nia politíka maka dadaun ne’e, promove projetu iha postu administrativu sira, ho intensaun hakarak liberta uluk komunidade sira iha postu asesu hotu ona bee maka foin espanda tan ba suku no aldeia, maibé BTL, E,P mos dadaun ne’e promove projetu balun, hodi transforma ba sistema urbana, ne’ebé installa metro kontadór ba uma kain ida-ida, hanesan iha Suku Cribas, Postu Administrativu Manatuto, ne’eb’e dadaun ne’e asesu bee ho regular.
Ezekutivu ne’e hatete, BTL, E.P moss imu pedidu hosi komunidade sira atu halo kanalziasaun bee iha área rural ne’e, BTL, E.P apoia material hodi halo servisu komunitariu, maibé sei akompaña mos hosi tékniku BTL, E.P, hodi halo installasaun tuir padraun tékniku nian.
Lidér maxímu BTL, E.P ne’e mos agredese ba parseiru hotu-hotu, liu liu PN-BESI-TL, ne’ebé tinan barak apoia hodi fo asistensia ba komunidade área rural sira, hodi kanaliza bee, tamba ne’e husu nafatin atu bele kontinua servisu hamutuk bao in, hodi bele dezenvolve di’ak liu tan setór bee, saneamentu no ijiene adekuadu iha timor-leste.
Diálogu nasionál ne’e, partisipa hosi Xefe Gabinete SEEAS, Diretór Ministériu ESTATAL, Reprezentante SEI, Autoridade lokál, no intedidade sira seluk.
Share on Social Media:
