Díli, 12/09/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis asina kontratu ho kompañia Always Construction Unipessoal Lda no Malaca Unipessoal Lda, kona-bá projetu Konstrusaun Sistema Bee Moos, ba komunidade sira iha munisípiu Ataúro no postu-administrativu Maubisse Villa, munisípiu Ainaro. Seremónia ne’e rasik realiza iha Salaun enkontru BTL, E.P Edifísiu BTL, E.P Caicoli, Díli.
Prezidente K.E BTL, E.P agradese ba kompañia sira ne’ebé iha interese hakarak servisu hamutuk ho BTL, E.P. No Ezekutivu ne’e mos husu ba kompañia sira, atu hala’o servisu ho responsabilidade, nune’e hodi bele garante kualidade projetu, nune’e komunidade sira ne’ebé sei asesu ba sistema bee moos refere, bele utiliza ba tempu naruk, atu nune’e bele fó biban ba governu liuhosi BTL, E.P hodi promove projetu ne’ebé hanesan ba fatin sira seluk, ne’ebé mak seidauk asesu ba bee moos.
Alende ne’e, Administradór munisípiu Ataúro sente kontente no sei koopera ho kompañia sira, hodi implementa projetu ne’e. No Autoridade ne’e mos agradese ba BTL, E.P nomos ba kompañia sira tamba bele tulun munisípiu foun ne’ebé foin estabelese, hodi bele presta nesesidade bázika ba komunidade sira.
Iha fatin hanesan, parte kompañia sira prontu hodi koopera ho BTL, E.P hodi ezekuta konfiansa ne’ebé fó ona ba kompañia sira, atu implementa projetu kona-bá sistema bee moos ne’e. No kompañia sira mos husu Autoridade Lokál no komunidade sira atu koopera, hodi bele finaliza obra refere ho di’ak, tuir tempu ne’ebé mak estabelese ona.
Projetu konstrusasun sistema bee moos, ba Postu-Administrativu Maubisse, munisípiu Ainaro sei benefisia ba populasaun rihun rua resin (2000) no sei fornese mós bee ba instituisaun sira hanesan edifísiu administrasaun postu-administrativu Maubisse, sentru saúde no eskola.
Enkuantu konstrusaun sistema bee moos ba iha munisípiu Ataúro, sei benefisia ba populasaun rihun haat resin (4750) no mós sei fornese bee ba instituisaun sira hanesan eskola, edifísiu administrasaun sentru saúde.
Entretantu projetu konstrusaun sistema bee moos ba munisípiu Ataúro sei gasta orsamentu hamutuk $862.781.00 enkuantu ba postu-administrativu Maubisse, munisípiu Ainaro ho totál orsamentu $501.945.00, implementasaun obra ba projetu iha fatin rua ne’e, ho durasaun tempu fulan neen.
Share on Social Media:
