Díli, 02/08/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis, partisipa iha atividade avaliasaun ba Fakuldade Enjeñaria Siénsia no Teknolojia, liu-liu ba iha Departamentu Enjeñaria no Informátika ne’ebé programátika hosi Ajénsia Nasionál ba Avaliasaun no Akreditasaun Akadémika (ANAAA). Atividade avaliasaun ne’e, realiza iha kampus UNTL, Fakuldade Enjeñaria Siénsia no Teknolojia, Hera.
Atividade avaliasaun ohin ne’e, hanesan faze ida, molok hetan akreditasaun hosi ANAAA.
Prezensa Stakeholder nian ba atividade avaliasaun ne’e, ho objetivu hodi fó komentáriu no satisfasaun kona-bá graduadu hosi Departamentu Enjeñaria no Informátika UNTL nian, ne’ebé mak servisu hamutuk ho Stakeholder sira iha Empreza ou instituisaun Estadu nian, alende ne’e, hodi fó mos sira-nia apresiasaun no avaliasaun kona-bá oinsa kapasidade graduadu hosi Departamentu ne’e nian, em termos liuhosi sira nia koñesimentu siénsia relasiona ho matéria ou koñesimentu ne’ebé graduadu sira apreende iha Departamentu refere, wainhira ba servisu ho Stakeholder sira ne’e, refleta duni bazeia ba nesesidade komunidade nian ou lae. Tamba ne’e presiza Stakeholder sira nia prezensa iha prosesu avaliasaun refere.
Hafoin rona tiha komentáriu hosi Stakeholder sira, parte jurí fó biban ba kada Stakeholder hodi fó sujestaun, oinsá Departamentu ne’e bele hadi’a di’ak liu tan iha futuru.
Perante iha atividade avaliasaun ne’e, Prezidente K.E BTL, E.P apresia koñesimentu no kapasidade graduadu hosi Departamentu Enjeñaria no Informátika ne’e, liu-liu graduadu ne’ebé hala’o knaar iha BTL, E.P fó duni impaktu pozitivu iha empreza ne’e, liu-liu iha Departamentu IT nian, signifika katak iha duni kapasidade no hala’o knaar tuir duni koñesimentu ne’ebé mak hetan iha universidade liu-liu Departamentu Enjeñaria no Informátika. No Ezekutivu ne’e mos fó sujestaun no rekomenda ba Departamentu ne’e, oinsá atu kapasita liu tan sira-nia koñesimentu, liuhosi treinamentu sira.
Entretantu atividade avaliasaun ne’e partisipa hosi BTL, E.P rasik, CNC no entidade ou Stakeholder sira seluk ne’ebé mak durante ne’e emprega ona, graduadu sira hosi Departamentu Enjeñaria no Informátika UNTL nian no akompaña mos partisipante sira seluk hosi estranjeiru via zoom.
Share on Social Media:
