Díli, 27/08/2024, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, partisipa diskusaun iha programa "Ita Nia Bainaka", ho tópiku “Esforsu sira ba dezenvolvimentu ne’ebé integradu ba setór bee, saneamentu no ijiene iha Timor-Leste”. Programa ne’e organiza hosi Plataforma Nasionál Bee, Saneamentu no Ijiene Timor-Leste (PN-BESI-TL), ne’ebé realiza iha stúdiu RTTL, E.P, Caicoli.
Objetivu PN-BESI-TL realiza talk show ida ne’e, hodi deskute kle’an kona-bá polítika ne’ebé integradu iha setór bee moos, saneamentu no ijiene liga ba aspetu igualdade jéneru defisiénsia no inkluzaun sosiál nomos mudansa klimátika hodi atinje PEDN 2030
Iha diskusaun ne'e, Prezidente K.E BTL, E.P esplika papel ou Key Performance Indicators (KPI) tolu tuir orientasaun hosi governu ne’ebé sita iha Dekretu Lei hodi guia servisu BTL, E.P nian, mak lori bee no saneamentu ba komunidade iha territóriu nasionál, signifika katak la’os de’it iha área urbanu maibé mos iha área rurál sira.
Maibé liga ba dadus ne’ebé iha katak, populasaun besik 20% mak seidauk asesu ba bee no 40% mak seidauk asesu ba saneamentu báziku. Prezidente K.E BTL, E.P hatete, ida ne’e hatudu katak, sei iha problema lubuk ida mak BTL, E.P hanesan instituisaun Estadu nian, sei esforsu atu lori servisu báziku sira ne’e ba komunidade sira, atu atinji metas ne’e, mak BTL, E.P daudaun esforsu hodi halo servisu tuir KPI ne’ebé iha, hanesan kontinua halo operasaun no manutensaun ba sistema bee ezistente sira hodi bele funsiona durante oras 24 durante loron hitu (24/7dias), segundu atu lori bee no saneamentu ba komunidade sira ne’ebé asesu ona bee maibé la sufisiente ou ba komunidade sira ne’ebé seidauk asesu bee no saneamentu liuhosi promove projetu foun sira no ikus liu mak rekolla/arrekada reseita atu bele kontribui ba dezenvolvimentu iha setór bee ne’e rasik.
Prezidente K.E BTL, E.P akresenta, hosi KPI tolu ne’e, BTL, E.P nafatin koko no halo esforsu hotu hodi realiza ou atinji metas hirak ne'e, maibé dala barak iha dezafiu, tanba sistema bee ne’ebé BTL, E.P konstroi ona inklui parseiru sira harii ona, maibé mos dalaruma komunidade balun halo estraga ou sobu tutuir. Tanba ne’e, kontinua husu ba populasaun sira atu kontribui asegura sistema sira ne’ebé iha ona, hodi fó biban ba BTL, E.P no parseiru sira bele lori bee ba komunidade sira seluk ne’ebé seidauk asesu ba bee moos.
Iha sorin seluk, bazeia ba dadus hosi PN-BESI-TL katak, iha populasaun balun iha kapitál Díli no munisípiu sira sei kontinua asesu bee hosi mota, bee matan no bee posu, kestaun seluk mak konstrusaun sistema foun, mudansa klimátika hodi fó impaktu ba rekursu bee nomos kestaun krusiál ida mak sustentabilidade liga ba operasaun no manutensaun tanba sistema ne’ebé harii liu tinan rua ba leten maioria la funsiona ou aat, nune’e komunidade labele asesu bee tuir matadalan ne’ebé mak governu hatuur ona nomos problema kualidade bee.
Relasiona ho kestaun hirak ne'e, Prezidente K.E BTL, E.P hatete, atu responde ba deskobrimentu sira kona-bá problema sistema bee moos ne’e, mak BTL, E.P nia esforsu hodi halo servisu advokasia em termu konsiensializa komunidade sira, atu tau matan rasik ba sistema ne’ebé instala ona no parseiru sira mos apoia halo ida ne’e, daruak nian mak introduz sistema foun liuhosi monta metru kontadór ba uma kain ida-idak. Tanba bazeia ba deskobrimentu sira katak, laiha konsiensia hodi tau matan ba sistema bee ne’ebé iha ona. Tanba ne’e, polítika BTL, E.P nian mak koko neneik atu transforma sistema bee rurál ba sistema bee urbana, atu nune’e BTL, E.P mak sei jere rasik sistema bee hirak ne’e, hodi garante nia sustentabilidade.
Share on Social Media:
