Díli, 15/07/2022. Prezidente Komisaun Ezekutiva BTL, E.P, Eng. Carlos Pelois dos Reis ho Reprezentante GT International husi Taiwan, Sr. Sheng Tien (Paul) Hsu, asina Memorandum of Understanding (MoU) ne’ebé maka asiste direita husi Ministru Obras Públikas (MOP), S.E Eng. Abel Pires ne’ebé iha oportunidade ne’e sai núdar testemuña ba asinatura MoU refere. Seremónia ne’e, realiza iha salaun enkontru Ministériu Obras Públikas (MOP), Caicoli, Díli.
Iha biban ne’e, Prezidente K.E BTL, E.P hatete, seremónia asina MoU ne’e, hanesan faze dahuluk hodi fó espasu ba GT International husi Taiwan, hodi apoia BTL, E.P, liu-liu hodi haree kona-bá oinsa atu halo jestaun ba rekursu ídriku, iha Timor-Leste, hanesan konstroi kaptasaun ou retensaun hodi prezerva bee, bainhira iha tempu udan.
“Ohin ita asina Memorandum of Understanding ho maluk GT International husi Taiwan ho intensaun hanesan ita loke dalan atu sira bele fó apoiu ita em termos de oinsá ita halo jestaun ba ita nia rekursu bee, ita observa katak ita nia nasaun ne’e iha foho mak barak, kuandu iha tempu udan, iha bee barak dalaruma bee sulin hotu ba tasi, dalaruma mos ita iha difikuldade em termos de asegura fornesimentu bee ba ita nia komunidade sira, wainhira tama ba iha tempu bailoro, Entaun ita presiza maluk sira ne’ebé iha matenek ou esperiénsia, tamnba iha sira-nia rai, Taiwan nia kondisaun jeográfika hanesan ita nia rai Timor no tinan-tinan sira hasoru Tufaun, maibé inundasaun ladun grave hanesan ita nian, entaun sira iha esperiénsia, entaun ita hakarak loke dalan liu husi asina MoU ne’e, depois mak ita bele haree detalla kona-bá oinsa mak sira bele ajuda ita ba oin”, dehan Prezidente Komisaun Ezekutiva BTL, E.P, Eng. Carlos Pelois dos Reis.
Ezekutivu Empreza Públika ne’e mos agradese ba GT International husi Taiwan ne’ebé iha interese no kompromisu hakarak apoia Timor-Leste kona-bá halo estudu ba fatin ne’ebé adekuadu ba retensaun ou prezervasaun bee.
“Ha’u ko’alia ona ho sira ekipa ida ne’e, katak sira iha interese hodi halo estudu depois mak sira mak fó hanoin ba ita, tamba sira iha esperiénsia halo dam iha sira nia rai, entaun sira sei halo estudu ho sira-nia fundus rasik, ne’e di’ak tamba ita la hasai osan, ema mai halo estudu depois fó sujestaun ba ita, hafoin mak ita haree ba oin, tamba ne’e, ita agradese tamba sira iha kompromisu hodi halo estudu, ba fatin ne’ebé mak adekuadu atu ita bele halo dam ne’e, depois sira rekomenda ba ita mak ita hanoin detalla ba oin ne’e atu halo oinsa”, akresenta Ezekutivu.
Iha fatin hanesan, Reprezentante GT International husi Taiwan hatete, liu husi asina MoU ne’e, parte rua (BTL, E.P ho GT International Taiwan) bele realiza kooperasaun servisu ho di’ak liu tan, hodi hala’o servisu kona-bá prezervasaun ou retensaun bee, iha Timor-Leste.
Hafoin seremónia asina MoU, Ministru Obras Públikas (MOP), S.E Eng. Abel Pires iha nia intervensaun elojia no agradese ba kooperasaun ne’ebé parte rua realiza ona, hodi fahe esperiensia ba malu, hodi kapasita rekursu umanu iha BTL, E.P no kapasitasaun instituasionál, atu bele halo servisu ho di’ak, liu-liu kona-bá fornesimentu bee moos no hein katak bele implementa akordu kooperasaun refere.
Share on Social Media:
