Díli, 27/09/2022. Prezidente Komisaun Ezekutiva BTL, E.P, Eng. Carlos Peloi dos Reis, hala’o enkontru ho kompañia Úniku husi Malazía , hodi ko’alia kona-bá produsaun fabríka bee nian, iha Timor-Leste, enkontru ne’e rasik, hala’o iha edifísiu BTL, E.P, Caicoli.
Iha sorumutu ne’e, ekipa husi kompañia úniku malazía ne’e, aprezenta referensia sira ka fahe esperiensia balun, ba Prezidente K.E BTL, E.P, hodi loke fabríka produz bee hemu nian, iha Timor-Leste.
Kompañia ne’e, loke ona fabríka produz bee hemu nian iha Nasaun China, tamba ne’e kompañia refere, iha interese atu kria fabríka produz bee hemu, tamba sira nia koñesimentu produz bee hemu ne’e, modenu liu, ka iha erra teknolójia nian.
Tamba tuir sira nia observasaun katak, populasaun Timor Leste ituan hela, maibé dala barak konsumu bee posu husi rai okos no mai husi mota, ne’ebé kontaminadu ho bee foer, mak sei fó impaktu ba saúde.
Ho kestaun ne’e, kompañia hakarak loke fabríka, hodi bele produz bee, ho kualidade di’ak, nune’e komunidade sira konsumu labele afeita ba saúde.
Hafoin Prezidente K.E BTL, E.P simu referensia sira ne’e, sei konfirma ba tékniku sira, hodi diskute ba asuntu ida ne’e, molok foti desizaun, hodi relata ba kompañia Úniku Malazía.
Uainhira BTL, E.P aseita ho pedidu ne’e, kompañia kria fabríka ida ne’e, bazeia ba BTL, E.P nia estudu rasik, ne’ebé sei produz bee husi sistema sira ezistente, hodi bele transforma ba bee hemu.
Kuandu BTL, E.P halo diskusaun ba asuntu ne’e,no iha ona rezultadu pozitivu, maka ekipa husi kompañia Úniku Malazía, sei mai fali Timor hodi kontinua prosesu ba faze tuir mai.
Share on Social Media:
