Díli, 19/12/2022, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, enkontru ho ekipa hosi PARTISIPA, iha Edifísiu sentrál BTL, E.P, Caicoli.
Objetivu hosi enkontru ne’e, hodi husu hanoin ou sujestaun balun hosi Ezekutivu BTL, E.P nian, kona-bá situasaun balun terrenu, liu-liu komunidade sira iha área rurál, ne’ebé iha ona sistema bee rurál ne’ebé instala ou harii hosi PNDS, maibé oinsá liuhosi programa PNDS nian bele apoia tan komunidade hodi bele tau matan ba iha sistema bee rurál, liu-liu liga ba parte operasaun no manutensaun ba sistema bee, atu ne’e komunidade sira bele uza sistema hira ne’e ba tempu naruk.
Iha entrevista, Asesór Bee Moos, iha Programa PARTISIPA hatete, sira deside mai halo konsultasaun ho BTL, E.P, tanba konsidera BTL, E.P hanesan na’in ou responsável máximu ba iha setór bee no iha koñesimentu kle’an kona-bá asuntu refere, ho nune’e ekipa hosi PARTISIPA mai dada lia ho I Vise-Prezidente K.E BTL, E.P, hodi rona sujestaun sira hosi Ezekutivu BTL, E.P nain.
Asesór hosi PARTISIPA ne’e informa, durante iha enkontru refere, I Vise-Prezidente K.E BTL, E.P hato’o sujestaun ou hanoin balun, liu-liu kona-bá importánsia oinsá atu bele tau atensaun ba parte operasaun no manutensaun ba iha sistema bee gravitasaun no sistema bomba.
“Sujestaun kapaas, foku liu ba iha importánsia oinsá atu haree didi’ak sistema gravitasaun no sistema bomba haforsa nafatin ezisténsia Grupu Maneja Fasilidade (GMF) sira, atu nune’e komunidade rasik bele hetan atendimentu di’ak liu tan iha parte manutensaun no operasaun nian, nomos hetan apoiu mos hosi governu tuir nesesidade. Kuandu GMF nia kapasidade la to’o, entaun sira bele asesu nafatin apoiu di’ak hosi governu, liuhosi PNDS nomos apoiu tan hosi SMASA iha nível munisípiu, hodi bele haree didi’ak sistema bee atu bele fó bee to’o bai ha populasaun sira to’o tempu naruk”, dehan Asesór.
Nia akresenta, instalasaun bee rurál iha territóriu nasioná, hamutuk 800, tanba ne’e, presiza kuidadu ou tau matan no jere didi’ak sistema hirak ne’e, atu nune’e sistema hirak ne’e labele estraga nomos tinan-tinan labele gastu fundus boot, hodi implementa sistema foun.
“Ohin ami ko’alia uluk kona-bá sistema PNDS nian ne’ebé iha Timor laran, iha ona sistema bee rurál ne’ebé harii liuhosi programa PNDS mak 800 ona, ne’ebé komunidade rasik mak hili ou konsidera hanesan prioridade no sira rasik mak hili no implementa liuhosi PNDS, maibé agora hanoin oinsá sistema bee sira ne’e, bele eziste to’o tempu naruk. Entaun ita hakarak proteje didi’ak komunidade nia infraestrutura nomos investimentu governu nian, atu nune’e la presiza hasai tan osan boot, kada tinan ba iha sistema foun sira, maibé oinsá bele tau matan didi’ak liuhosi hosi komunidade nomos instituisaun governu nian, para ho osan kiik bele estende tan sistema nia durasaun no bele servi komunidade to’o tempu naruk”, hatete Nia
Enkuantu informasaun kona-bá planu ou programa ida ne’e, PNDS rasik hato’o ona ba BTL, E.P no ANAS, I.P, ne’ebé konsidera hanesan na’in ba setór bee no daudaun ne’e, iha ona ba faze konsultasaun ho entidade sira ne’ebé iha esperiénsia ou koñesimentu kle’an liga ba asuntu bee, molok hakatk ba nia implementasaun.
Share on Social Media:
