Díli, 13/09/2022, Ministru Obras Públikas (MOP), S.E Eng Abel Pires da Silva, akompaña hosi Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis ho ekipa, hala’o enkontru ho Task Team hosi Banku Mundiál. Enkontru ne’e rasik lidera hosi Ministru Obras Públikas, partisipa mos hosi parte ANLA, ADN, Aprovizionamentu no enkontru ne’e realiza iha salaun enkontru, Gabinete Ministériu Obras Públikas (MOP), Caicoli, Díli.
Objetivu hosi enkontru ne’e, hodi atualizasaun progresu DED ba Water Supply Project Díli ho Baucau nian ba parseiru Banku Mundiál, tamba sira hakarak hatene prosesu servisu dezeñu ba munisípiu kapitál rua ne’e nian no nia progresu dezeñu ne’e rasik to’o iha ne’ebé. Alende ne’e, ko’alia mos kona-bá asuntu importante sira seluk.
Durante iha enkontru ne’e, alende atualizasaun kona-bá progresu DED Water Supply Project Díli ho Baucau nian, ko’alia mos asuntu esensiál lubuk ida, kona-bá rai no sosiál nian, (social and Enviromental issue), LARAP (Land Acquisition Resettlement Action Plan) ba Baucau no Díli, Cost Recovery, Pontu Vokál (Vocal Point) hosi MOP nian ba BTL, E.P hodi haree kona-bá orsamentu empréstimu nian no liña koordenasaun entre Banku Mundiál ho BTL, E.P no pontu vokál sira ne’e mos sei lidera enkontru mensál no enkontru sira seluk kona-bá projetu sira, Estabelesimentu PMU BTL, E.P nian (PMU Establishment), hodi apoia servisu iha BTL, E.P nian.
Entretantu dezeñu DED Water Supply Project ba munisípiu Baucau nian, finaliza ona no submete ona ba ADN hodi halo verifikasaun, enkuantu dezeñu DED Water Supply Project ba Díli nian konsultór sira entrega ona mai BTL, E.P, maibé daudaun ne’e, sei iha hela ADB hodi haree dezeñu refere, hafoin mak bele submete ba ADN, hodi bele halo mos verifikasaun ba dezeñu hirak ne’e no sei haruka fila-fali mai BTL, E.P, hodi orienta konsultór sira bele hadi’a, wainhira iha komentáriu ruma hosi ADN, hafoin finaliza iha faze verifikasaun, sei submete ba KAFI hodi halo diskusaun no halo aprovasaun, molok hakat ba faze aprovizionamentu no implementasaun.
Enkontru ne’e, partisipa mos hosi parte ANLA, ADN, Aprovizionamentu MOP nian.
Share on Social Media:
