Díli, 10/08/2022, Prezidente Konsellu Fiskál BTL, E.P, Sr. João Amaral, akompaña hosi Vogál Konsellu Fiskál BTL, E.P nain rua, hala’o enkontru ho Diretór hosi Diresaun Enjeñaria no Investimentu (D.E.I) BTL, E.P ho ekipa, iha sala enkontru Ezekutivu BTL, E.P nian, iha edifísiu sentrál BTL, E.P, Caicoli.
Objetivu husi enkontru ne’e, hodi atualiza ka ko’alia kona-bá ezekusaun orsamentu ne’ebé aloka ba Diresaun Enjeñaria no Investimentu (D.E.I) no ezekusaun orsamentu tuir duni planu sira ne’ebé trasa ona ka lae, tamba Konsellu Fiskál hanesan komisaun fiskalizadór ne’ebé hodi fiskaliza atividade hotu ne’ebé mak hala’o iha BTL, E.P, tamba ne’e Ezekutivu sira hosi Konsellu Fiskál BTL, E.P hakarak hatene Diresaun ne’e ninia rezultadu ezekusaun, liu-liu planu no orsamentu ba trimester dahuluk nian.
Durante iha enkontru ne’e, Diretór D.E.I BTL, E.P hato’o klarifikasaun kona-bá ezekusaun planu no orsamentu trimestre dahuluk hosi D.E.I nian ba Konsellu Fiskál BTL, E.P, tamba sira konsidera D.E.I nia ezekusaun orsamentu ladun iha progresu, ho nune’e Komisaun Fiskalizadór sira hakarak hatene nia motivu husi kestaun refere.
“Ohin ita esplika ba Konsellu Fiskál kona-bá planu ne’ebé ita trasa ona ka halo ne’e, ezekuta hotu ga lae no mós ninia orsamentu ne’ebé aloka mai ne’e ita ezekuta hotu ga lae no ita ezekuta orsamentu ne’ebé aloka mai ne’e tuir duni planu ne’ebé mak iha ne’e ga lae. Liu-liu kona-bá orsamentu ne’ebé fahe ba parte rua, ida mak husi Fundu Infra-estrutura nian ne’ebé mak Fundu Infra-estrutura rasik mak jere no mós orsamentu ne’ebé transfere direta mai BTL, E.P, mak ita uza hanesan hodi selu ba projetu anteriór sira no mós ba projetu foun sira ne’ebé mak ita promove hela, nune’e parte Komisaun Fiskalizadór sira mai haree, hakarak atu hatene mais ou menos tamba saida mak ita nia ezekusaun orsamentu ne’e la tuir orsamentu ne’ebé aloka mai, maibé ita ohin esplika klaru katak ita nia orsamentu ne’ebé uza ba halo pagamentu ba projetu anterór nian la’o di’ak hotu, iha trimestre dahuluk nian ezekusaun orsamentu ki'ik ka ladun iha signifikativu, tamba iha prosesu aprovizionamentu no dezeñu tarde, nune’e Konsellu Fiskál hakarak mai husu klarifikasaun husi D.E.I”, esplika Diretór D.E.I BTL,E .P.
Diretór D.E.I akresenta, maske orsamentu iha trimestre dahuluk ladun iha progresu, maibé ba planu atuál nian iha trimestre daruak no datoluk nian ne’e, konsege liu tiha orsamentu ne’ebé transfere mai D.E.I, tamba planu D.E.I nian hodi implementa projetu foun sira ne’e, ba postu no suku sira hamutuk dollar Amerikanu millaun 9 ($ 9 millaun).
Enkuantu transferénsia orsamentu ba Pakote Rekuperasaun Ekonómika (PRE) nian hamutuk Dollar Amerikanu millaun 16 ($16 millaun) ne’ebé transfere mai BTL-EP, maibé foin mak implementa pursentu lima (5%) ba Projetu Lavandaria no Latrines ba iha Munisípiu hitu (7) ho totál Orsamentu hamutuk $ 839,000, balansu husi Orsamentu PRE sei iha millaun 15 ($ 15 millaun) no daudaun ne’e, projetu balun sei iha hela prosesu aprovizionamentu nomós iha sorin seluk tamba iha problema kona-bá rai.
Share on Social Media:
