Baucau, 07/02/2025, Vise-Prezidente Komisaun Ezekutiva BTL, E.P, ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva BTL, E.P, ba Asuntu Korporativu, Sr. Manuel Tomás Amaral de Carvalho, akompana Diretór O&M BTL, E.P, Legál, hala’o enkontru ho Kordenadór BTL, E.P, Munisípiu Baucau ho ekipa, ne’ebé realiza iha Edifísiu BTL, E.P, Munisipiu Baucau.
Kordenador BTL, E.P, Munisípiu Baucau, partilla informasaun kona-bá BTL, E.P nia prezensa iha munisípiu Baucau, ne’ebé iha tempu anterior, nunka rekolla reseita ba estadu, maibé hafoin transforma DGAS ba BTL, E.P, konsege rekolla reseita ho montante bo’ot, hafoin munisípiu Díli.
Iha biban ne’e, Kordenadora mos hatoo preokupasaun, liu-liu menus rekursu umanu no kestaun seluk tan, ba komisaun ezekutiva, hodi tau konsiderasaun.
Vise-Prezidente Komisaun Ezekutiva BTL, E.P, ba Asuntu Korporativu, Sr. Manuel Tomás Amaral de Carvalho hatete, Komisaun Ezekutiva BTL, E.P sei halo esforsu tomak, hamutuk ho direjente no funsionáriu sira, atu mellora servisu no moderniza empreza públika ida ne’e, hodi bele arrekada reseita ho di’ak.
Husu ba empregador sira, atu hatudu servisu ho professional no bazeia ba amandamentu di’ak, hodi dezenvolvimentu ba setór bee no saneamentu.
Iha fatin hanesan, Vise-Prezidente Komisaun Ezekutiva BTL, E.P, ba Asuntu Tékniku, Sr. José Filipe Ximenes Smith hatete, maske ekipa destakadu hasoru dezafiu no obstakulu oi-oin, maibé rezultadu servisu pozitivu tebes.
“Ha’u hatene maluk sira senti triste, tamba iha estasaun bomba no Balkaun iha Kota Lama Baucau, hetan eviksaun hosi autoridade lokál, ida ne’e sei prejudika ba kliente sira atu halo pagamentu tarifaria, tamba mai liu edifísiu sentrál ne’e distansia do’ok. Ida ne’e ami ezekutiva BTL, E.P sei buka solusaun ba kestaun ida ne’e”.
Komisaun Ezekutiva mos ho ekipa observa direita fatin eviksaun, ne’ebé lokaliza iha Baucau Kota Lama.
Share on Social Media:
