Díli, 25/10/2024. Prezidente Komisaun Ezekutiva (KE) Bee Timor-Leste Empreza Públika (BTL, E.P) Eng. Carlos Peloi dos Reis, akompaa hosi Vise-Prezidente KE BTL, EP ba Asuntu Sistema Bee, Saneamentu no Drenajen, Sr. Gustavo da Cruz, no Vise-Prezidente KE BTL, E.P ba Asuntu Boa Governasaun no Fortalesimentu Institusionál, Sra. Elizabeth Amaral enkontru ho parseiru dezenvolvimentu sira ne’ebé kompostu hosi ADB, JICA, Unicef, MCC, WB, DFAT no MCA-TL, IP, iha salaun reuniaun BTL, E.P, Caicoli.
Objetivu hosi reuniaun ne’e, hodi informa desizaun Governu nian ne’ebé aprova hosi Konsellu Ministru kona-bá destituisaun Prezidente Konsellu Administrasaun BTL, E.P nomos nomeasaun Prezidente Konsellu Administrasaun BTL, E.P foun, inklui introduz Prezidente Konsellu Administrasaun BTL, E.P no Vogál foun ba parseiru dezenvolvimentu sira.
Durante reuniaun ne’e, Ezekutivu BTL, E.P atualiza mos atinjimentu ou progresu sira ne’ebé iha liuhosi kooperasaun ou servisu hamutuk entre BTL, E.P ho parseiru dezenvolvimentu sira, durante lideransa dahuluk nian nomos faillansu ou dezafiu sira ne’ebé durante ne’e BTL, E,P enfrenta, sai hanesan lisaun ida, nune’e bele mellora di’ak liu tan iha futuru.
Iha biban ne’e mos, Prezidente KA no KE BTL, E.P, Eng. Carlos Peloi dos Reis, hato’o agradesimentu ba parseiru dezenvolvimentu sira hotu nia apoia tomak ba BTL, E.P durante iha Prezidente nia lideransa ou durante mandatu lideransa atuál nian.
No ikus nian, Prezidente KA no KE BTL, E.P atuál, nafatin husu ba parseiru sira-nia apoiu ba BTL, E.P iha lideransa foun nian, atu dezenvolve setór bee no saneamentu iha Timor-Leste (TL).
Iha okaziaun ne’e, parseiru sira mos agradese ba Prezidente KA no KE BTL, E.P atuál nia servisu hamutuk, durante lidera Empreza Públika ne’e no sira nafatin hato’o sira-nia prontidaun hodi apoia BTL, E.P nomos hato’o parabens ba Prezidente KA no KE inklui Vogál BTL, E.P foun.
Share on Social Media:
