Díli, 14/07/2022. I Vise-Prezidente Komisaun Ezekutiva BTL, E.P, Sr. Gustavo da Cruz, ne'ebé akompaña husi ekipa D.E.I no D.O.M hala'o enkontru ho parseiru DFAT no PARTISIPA, iha salaun enkontru, edifísiu sentrál BTL, E.P, Caicoli, Díli.
Objetivu husi enkontru ne'e, mak DFAT/PARTISIPA atualiza progresu servisu ba melloramentu sistema iha Bee Moos no mudansa infrastrutura balun iha parte Mutudare nian.
"Ohin ita enkontru ho ekipa husi DFAT nian, ne'ebé apoia BTL, E.P, ba halo melloramentu sistema iha Bee Moos no Mutudare. Iha enkontru ne'e, ekipa ne'e atualiza kona-bá progresu servisu iha Bee Moos nian, no mós iha asuntu daruak nian ami ko'alia kona-bá pontu rua husi Mutudadre nian, pontu dahuluk mak kona-bá BTL, E.P aseita ka lae, ba iha mudansa iha intake Mutudare, husi intake antigu bele muda ba fatin foun ne'ebé mak sira propoin, pontu daruak nian, kona-bá liña transmisaun no distribuisaun ne'ebé iha parte Mutudare nian, atu kañaliza tun mai, (Díli)", dehan I Vise-Prezidente Komisaun Ezekutiva BTL, E.P, Sr. Gustavo da Cruz.
Durante diskusaun ne'e, parte BTL, E.P mós konkorda hodi halo mudansa tuir fatin ne'ebé mak DFAT rekomenda ona, maibe presiza halo análize ne'ebé kle'an molok muda infrastrutura hirak nee.
“Husi diskusaun ne'ebé mak iha, pontu tolu ne'ebé ami haree, Bee Moos nian ne'e só atu atualiliza informasaun de'it, maibé tuir sira-nia tarjetu/alvu katak to'o fim de setembru Bee Moos nian ne'e sira sei entrega. Kona-bá Mutudare nian sei iha kontinua ba diskusaun, ba pontu rua, muda intake ka la muda no kañu sira atu hakoi ne'e, iha mota ninin ou mota klaran ka uza ponte kañu nian, ida ne'e, ita nia enjeñeiru sira sei tur hamutuk ho sira hodi haree, maibé tarde liu iha fulan agostu nia laran tenke iha ona desizaun finál ba asuntu ida ne'e, nune'e bele kontinua servisu no ami aseita", hatete I Vise-Prezidente Komisaun Ezekutiva BTL, E.P.
Perante iha reuniaun ne'e mós, BTL, E.P propoin katak fundus ne'ebé apoia husi Governu Austrália ne'e, atu utiliza ho kuidadu no efisiénsia.
"Haree mos ba orsamentu ne'ebé alokadu ba iha projetu refere, ne'ebé apoiu gratuíta husi Governu Austrália ami husu atu bele uza osan ne'ebé iha ho efisiénsia atu nune'e karik iha servisu balun ne'ebé presiza ita bele rezerva osan balun hodi bele akomoda servisu sira nee”, propoin Ezekutivu.
Enkuantu projetu melloramentu sistema bee moos ne'e, hetan apoiu orsamentu husi Governu Austrália liu husi DFAT/PARTISIPA hodi jere, atu hadi'a sistema hirak ne'e, nune'e bele fornese bee moos ba komunidade sira.
Share on Social Media:
