Díli, 08/09/2022, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sr. Gustavo da Cruz, hala’o enkontru ho Diretór País WaterAid Timor-Leste, Sr Justino da Siva ho ekipa, iha I Vise-Prezidente K.E BTL, E.P nia knaar fatin, edifísiu sentrál BTL, E.P, Caicoli, Díli.
Objetivu hosi enkontru ne’e, hodi halo konsultasaun ho BTL, E.P kona-bá planu estratéjiku foun WaterAid nian ba tinan lima mai (2023-2027), tamba BTL, E.P hanesan parseiru importante no instituisaun ida ne’ebé lidera dezenvolvimentu programa bee no saneamentu nian, maske hanesan Empreza Públika, maibé importante tenke rona tamba hanesan parseiru signifikadu iha implementasaun ba setór bee, saneamentu no ijiéne.
Durante iha enkontru ne’e, parte WaterAid mos hato’o pergunta lubuk ida kona-bá planu tinan lima nian hanesan iha setór bee no saneamentu, mudansa klimátika nomos área sira seluk ba I Vise-Prezidente K.E BTL, E.P nian no husu atu ezekutivu BTL, E.P ne’e, fó nia hanoin balun relasiona ho asuntu hirak ne’e, nune’e mos parte BTL, E.P hato’o rekomendasaun balun, liu-liu kona-bá atu oinsá bele dezenvolve iha área bee, saneamentu no ijiéne bele di’ak liu tan, iha futuru.
Diretór WaterAid Timor-Leste hatete, durante iha enkontru ne’e, Ezekutivu BTL, E.P esklarese kona-bá fatór balun ne’ebé mak difikulta atinjimentu bee, saneamentu no ijiéne hanesan mudansa klimátika nomos partilla informasaun balun kona-bá BTL, E.P nia tarefa prioridade sira, hodi kontinua tau matan ba bee iha área urbana no rurál
Diretór País WaterAid Timor-Leste sente kontente tamba hetan apresiasaun boot tebes hosi I Vise-Prezidente BTL, E.P kona-bá servosi advokasia ne’ebé WaterAid durante ne’e hala’o ona liuhosi kolaborasaun sosiedade sivil sira. No Ezekutivu BTL, E.P nafatin enkoraja ba WaterAid ho parseiru sira, atu konti nua nafatin servisu hirak ne’e, tamba kontribui on aba mudansa lubuk ida, liu-liu kona-bá hatutan Governu ou BTL, E.P, hodi partilla informasaun ba komunidade sira kona-bá bee, saneamentu no ijiéne.
WaterAid hanesan parseiru BTL, E.P nian, ne’ebé durante ne’e implementa hela nia programa prinsipál ba BESI rurál ne’ebé mak inkluzivu no rezilénsia klimátika iha munisípiu Liquiça no Manufahi, tuir estratejia WaterAid TL nian, hodi apoiu atinjimentu meta objetivu dezenvolvimentu sustentável ba setór bee, saneamentu no ijiéne liuhosi Planu Estratéjiku Dezenvolvimentu Nasionál.
Share on Social Media:
