Díli, 20/07/2022, I Vise-Prezidente Komisaun Ezekutiva BTL, E.P, Sr. Gustavo da Cruz, akompaña ekipa husi Ministériu Finansas (MF) ne’enbé kompostu husi Sr. Diretór-Jerál Jestaun no Mobilizasaun Rekursu Externu, Ministériu Finansas, Diretora Nasionál Rekursu Impréstimu nomos Asesór halo aprezentasaun, iha Konsellu Ministru, iha Palásiu Governu Díli.
Objetivu husi aprezentasaun ne’e, hodi solisita ba Konsellu Ministru atu halo aprovasaun ba Akordu Empréstimu Finansiamentu husi Banku Mundiál nomos solisita ba Konsellu Ministru hodi autoriza Ministru Finansas hodi asina Akordu Empréstimu refere.
Perante iha sorumutu ne’e, Konsellu Ministrus delibera ona hodi autoriza Ministru Finansas, Rui Augusto Gomes, atu selebra Akordu Finansiamentu ho Banku Mundiál (Asosiasaun Internasionál Dezenvolvimentu) ba projetu fornesimentu bee iha Díli.
Akordu ida-ne’e ho objetivu atu halo kontratasaun empréstimu ida ho valór besik dolar Amerikanu millaun 121, ho períodu maturidade tinan 40, hodi finansia projetu fornesimentu bee iha Kapitál Díli.
Programa ne’e, sei dezenvolve liuhusi finansiamentu ho durasaun tinan hitu ho komponente tolu, komponente dahuluk mak refere ba dezenvolvimentu infraestrutura sira abastesimentu bee nian, komponente daruak mak kona-bá hadi’a kapasidade institusionál servisu sira ba setór ida-ne’e no datoluk nian hodi hadi’a jestaun projetu sira.
Share on Social Media:
