Hera, 30/906/2022. I Vise-Prezidente Komisaun Ezekutiva BTL, E.P, Sr. Gustavo da Cruz, partisipa no sai mós núdar oradór iha Sosializasaun ho tema “Influensia Polítika iha setór Bee no Saneamentu hodi Responde ba Nesesidade ema ho Defisiensia. Sosializasaun ne’e realiza iha salaun Auditóriu UNTL, Hera.
Sosializasaun ida ne’e núdar meius ida atu hato’o importánsia servisu Bee, Saneamentu no Ijiene (BESI) sensível ba disabilidade no foka liu ba (hakbi’it no empodera Feto foin sa’e sira iha karreira Enjeñária/Enjeñeiru) ba estudante graduadu iha área Konstrusaun Sivil iha Universidade sira iha Díli laran.
I Vise-Prezidente K.E BTL, E.P, iha nia intervensaun, hato’o katak Sosializasaun ne’e nudár oportunidade di'ak atu nune’e estudante sira bele hatene no akompaña progresu dezenvolvimentu iha setór bee moos, saneamentu no ijiene nian.
“ Oportunidade ida ne’e, oportunu duni, ba alin sira hotu, atu akompaña progresu dezenvolvimentu iha setor bee, saneamentu no ijene nian iha ita nia nasaun ne’e ”. Hateten I Vise-Prezidente K.E BTL, E.P, Sr. Gustavo da Cruz.
Ezekutivu ne’e hatutan, agora hahú sosializa ba entidade tomak, atu nune’e bele transforma informasaun sira liga ho dezenvolvimentu iha setór bee, saneamentu no ijiene.
“ Agora ita hahú Sosializa, ba ita nia entidade tomak, ita ne’ebé servisu iha Governu, servisu instituisaun hotu, Internasionál, Nacionál, ho NGO, parte academia, atu oinsá bele transforma informasaun liga ho dezenvolvimentu iha setór Bee, Saneamentu no Ijene, ida ne’e nudár nesesidade báziku ba ita umanu no governo nafatin iha komprimisiu atu oinsá liberta ita-nia povu ne’e husi kondisaun ida bee, saneamentu no ijene ”. Dehan nia.
I Vise-Prezidente K.E BTL, E.P, iha nia intervensaun salienta, objetivu husi sosializasaun ne’e, iha entidade tomak, espesiál iha akademia, Universitáriu sira, atu habelar informasaun tamba instituisauun Governu sente katak, governu rasik sei la halo milagre ba iha sidadaun hotu, ho nune’e liu husi kooperasaun ho ajénsia sira, ONG sira, hamutuk mos ho Universitáriu sira nune’e bele disemina informasaun.
“ Habelar informasaun ho kondisaun ida oinsá, agora ita halo ida ne’e, maibé Universitariu sira, alin sira kuandu fim de estudu, ikus nian, sei iha estájiu sosial, sei tun ba komunidade sira, matéria sira ne’ebé agora atu aprezenta ne’e, alin sira lori no ba habelar tutan ba ita nia inan-aman sira iha área remotas ou área rurais, oinsá atu moris ijene, oinsá iha moris diak. Tan ne’e governu nafatin halo kooperasaun di’ak ho ajente sira, hodi promove programa sira ne’ebé dalaruma governu rasik laiha kbiit atu bele halo buat hotu-hotu ”. Hateten I Vise-Prezidente K.E BTL.
Sosializasaun ba foin sa’e no Estudante Fakuldade Enjeñaria Nível Universidade iha Díli ne’e rasik, organiza husi, Plataforma Nasionál BESI Timor-Leste, Enkuantu oradór ba atividade sosializasaun ne’e maka hanesan I Vise-Prezidente K.E BTL, E.P, Sr. Gustavo da Cruz, Prezidente Konsellu Fiskál Plataforma Nasionál BESI Timo-Leste Sra. Esménia Laura Ximenes, Decano Fakuldade Enjeñaria, Siénsia no Teknolojia UNTL, Sr. Adalfredo Guterres da Silva Ximenes, M. Eng, Koordenadór Programa Bee ba Feto (CARE) Sr. Feliciano da Costa Araújo. Partisipante sira iha sosializasaun ne’e mai husi, estudante Enjeñaria Nível Universidade iha Dili.
Share on Social Media:
