Díli, 05/08/2022, I Vise-Prezidente K.E BTL, E.P, Sr. Gustavo da Cruz, akompaña husi Jestor D.O.M BTL, E.P hala’o enkontru ho parseiru UNICEF, iha salaun enkontru, edifísiu sentrál BTL, E.P, Caicoli.
Objetivu husi enkontru ne’e, hodi atualiza progresu servisu ne’ebé Unicef implementa ona iha kapitál Díli no iha Munisípiu Manatuto no iha biban ne’e, UNICEF hato’o mos sira nia prontidaun hodi nafatin apoiu Timor-Leste, liu husi BTL, E.P tamba BTL, E.P hanesan kanál ida ne’ebé mak haree kona-bá asuntu bee, saneamentu no ijiene.
Durante iha enkontru ne’e, parte rua (BTL, E.P ho UNICEF) diskute mos kona-bá asuntu haat ne’ebé mak UNICEF apoiu ba Timor-Leste liu husi kooperasaun servisu entre BTL, E.P ho UNICEF, hanesan instala estasaun fase liman, iha kapitál Díli, sei apoiu fundus hodi fó treinamentu ba Grupu Jestaun Fasilidade ou koñesidu ho Grupu Maneja Fasilidade (GMF), hodi bele funsiona hikas atu oinsa hodi halo monitorizasaun ba sistema bee rurál ne’ebé ezistente nomos apoiu rehabilitasaun ka konstrusaun sentina públiku iha munisípiu Manatuto no asuntu ikus nian kona-bá UNICEF prontu atu apoiu nafatin materiál ou ekipamentu ba iha sistema bee rurál sira.
Hafoin atualizasaun progresu servisu hirak ne’e husi UNICEF, parte BTL, E.P nafatin aproxima no agradese tamba bele iha nafatin kooperasaun ne’ebé di’ak entre instituisaun, maske iha mudansa estatutu maibé parseiru sira nafatin ho sira nia apoiu ba iha setór Wash, tamba ne’e Unicef hatene katak Wash ne’e eziste de’it iha Ministériu Obras Públikas (MOP), tamba ne’e MOP nia kanál ne’ebé mak iha responsabilidade ba bee, saneamentu no ijiene mak BTL, E.P, nune’e UNICEF hakarak no kontinua apoiu ba BTL, E.P mak setór ne’e sei guia atividade hirak ne’e ba iha sub-setór sira ne’ebé mak presiza ho nune’e, BTL, E.P nafatin agradese ba konfiansa no apoiu tomak husi UNICEF.
Tuir informasaun estasaun fase liman permanente ne’ebé instala iha kapitál Díli ne’e hamutuk 14, maibé 8 mak daudaun ne’e, iha hela faze konstrusaun no balun finaliza ona no 6 seluk seidauk implementa tamba sei halo uluk identifikasaun husi tékniku D.O.M BTL, E.P hamutuk ho UNICEF, atu haree fatin ne’ebé mak di’ak ou apropriadu hodi instala molok implementa obra refere no fatin ne’ebé mak instala estasaun fase liman permanente hirak ne’e hanesan, iha Jardim Largo Lecidere, Jardim 5 de Maio Colmera no fatin seluk tan iha kapitál Díli.
Obra ba sentina públiku ne’ebé implementa iha munisípiu Manatuto, daudaun ne’e nia konstrusaun fíziku atinji ona pursentu 95 (95%), maibé UNICEF mos kestiona kona-bá ema balun ne’ebé mak ba sobu fasilidade ou ekipamentu sira, maske konstrusaun la’o hela, tamba ne’e sira nafatin esforsu hodi aselera obra refere, atu bele entrega ba autoridade munisípiu liu-liu ba jestaun merkadu Manatuto nian, hodi bele halo kontrolu no jere rasik fasilidade hirak ne’e.
Share on Social Media:
