Díli, 13/02/2024. Funsionáriu Bee Timor-Leste, Empreza Públika (BTL, EP) tuir semináriu kona-bá "Violénsia Bazeia ba Jéneru no Asédiu Sexuál". Semináriu ne'e organiza liuhosi servisu hamutuk entre BTL, E.P no UN Women no realiza iha sala reuniaun, Xanana Sport Center-FFTL, Díli.
Semináriu ne'e oferese ou fasilita hosi JU,S liuhosi UN Women iha Timor-Leste no abertura direta hosi Vise-Prezidente Komisaun Ezekutiva BTL, EP ba Asuntu Boa Governasaun & Fortalesimentu Institusionál, Sra. Elizabeth Amaral. No objetivu hosi semináriu ne'e, hodi hametin koñesimentu kona-bá igualdade jéneru no violénsia bazeia ba jéneru iha Timor-Leste, Estadu no sosiedade. Alende ne'e, hodi hasa’e abilidade atu identifika hahalok ne’ebé reprezenta VBJ, asédiu sexuál no viola regra internal nomos atu foti asaun ne'ebé hametin ambiente ho respeitu ba regra no ema hotu-hotu nia direitu.
Iha abertura, Vise-Prezidente KE BTL, E.P ba Asuntu Boa Governasaun no Fortalesimentu Institusionál husu ba funsionáriu sira atu aproveita didi'ak oportunidade ne'e, hodi rona esplikasaun hosi oradór ou fasilitadór sira, nune'e ho informasaun ou koñesimentu ne'ebé hetan hosi ekipa JU,S bele sai hanesan bukae ida ba funsionáriu sira hotu, atu bele tau iha prátika no tenke hatete lae ba asédiu sexuál, tantu iha uma, sosiedade no liu-liu iha servisu fatin. Nune'e mos agradese ba ekipa JU,S no UN Women iha TL nia disponibilidade hodi bele partilla ona informasaun ba funsionáriu sira ligadu ho tema ohin loron nian.
UN Women TL agradese mos ba partisipasaun funsionáriu BTL, E.P nian, durante iha semináriu ne'e, hein katak informasaun ne'ebé ohin ekipa hato'o ou partilla ona bele aplika no bele fahe tutan ou hatutan mos ba kolega no família sira. No dezeja kooperasaun servisu ne'e kontinua nafatin ba futuru.
Matéria esensiál hirak ne'ebé ko'alia iha semináriu ne'e mak "Igualdade Jéneru, Sexu × Jéneru no Norma Sosiál nomos Violénsia Bazeia ba Jéneru, Konseitu Asédiu Sexuál, Responsabilizasaun ba Asédiu Sexuál no Kompromisu ba Promosaun Igualdade Jéneru".
Seminariu ne'e hetan partisipasaun maximu husi funsionariu BTL, EP sira iha Dili nomos Munispiu sira hotu.
Share on Social Media:
