Manufahi, 24/01/2024, Iha loron 18 fulan janeiru tinan ne'e, Enjeñeiru hosi Departamentu Infraestrutura akompaña hosi Supervisor Bee Timor-Leste, Empreza Públika (BTL, E.P) ne'ebé destakadu iha postu-Administrativu Fatuberliu, halo monitorizasaun ba projetu konstrusaun sistema bee moos-1 no 02 ne'ebé implementa hela iha postu-administrativu Fatuberliu, munisípiu Manufahi.
Monitorizasaun ne'e, hodi observa direta servisu fíziku iha terrenu no atu bele hatene progresu hosi projetu ne'e rasik, nune'e mos hodi bele garante projetu refere nia kualidade, nune'e wainhira finaliza, benefisiáriu sira ne'ebé sei uza obra refere bee dura ba tempu naruk.
Ekipa Infraestrutura relata, bazeia ba rezultadu monitorizasaun nian katak, obra fíziku kona-bá konstrusaun sistema bee moos iha postu Fatuberliu-01 atinji ona pursentu 70 (70%) no kaer hosi kompañia Haksolok HJM Unip Lda ho durasaun tempu fulan neen.
Enkuantu obra fíziku kona-bá projetu konstrusaun sistema bee moos iha Fatuberliu -02 nian, foin mak atinji pursentu 25 (25%). No implementa hosi kompañia 1203 Jahar Investment Holding Company Lda, ho durasaun tempu fulan neen.
Projetu konstrusaun sistema bee moos ne'e, wainhira finaliza, sei fornese bee moos ba komunidade no ba fasilidade públiku balun iha postu-administrativu Fatuberliu.
Alende ne'e, projetu sistema bee moos ne'ebé BTL, E.P promove iha postu-administrativu sira, sei ho sistema urbana, iha ne'ebé sei kanaliza bee direta ba populasaun sira nia hela fatin no instala mos metru kontadór ba uma kain ida-idak.
Share on Social Media:
