𝐃𝐢́𝐥𝐢, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚 𝟐𝟖 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔
Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, Vise-Prezidente KE BTL, E.P ba Asuntu Tékniku, José Filipe Ximenes Smith, hamutuk ho Diretór DAF, Sidónio Freitas, Diretór DEI, João da Cruz Cardoso, Diretór DOM, Aleixo dos Santos, Jestora Finansas no Kontabilidade, Jestór RP&GIS, Auditora Interna BTL, E.P nian, Enjeñeiru DEI, akompaña aprezentasaun hosi Departamentu Kontrolu Kualidade no Ambientál kona-bá Programa Konstrolu Kualidade Bee (PCQA, sigla portugés) tinan 2027 nian, ne’ebé hala’o iha sala reuniaun BTL, E.P sentrál, Caicoli.
Aprezentasaun proposta PCQA ne’e ho objetivu, hodi haree hamutuk, halo análiza no bele hetan 𝑓𝑒𝑒𝑑𝑏𝑎𝑐𝑘 hosi Ezekutivu no kargu xefia sira, molok hetan aprovasaun no submete ba entidade reguladora bee nian. Konsultasaun ne’e mos nu’udár etapa importante ida, atu asegura katak programa ne’e reflete BTL, E.P nia prioridade operasionál, responsabilidade regulatória no kompromisu atu kontinua hadi’a kualidade no seguransa bee ne’ebé fornese ba konsumidór sira.
Perante enkontru, Prezidente KE BTL, E.P subliña katak kualidade bee nu’udár indikadór xave ida ba susesu BTL, E.P nian, iha prestasaun servisu fornesimentu bee, tanba kualidade bee reflete diretamente instituisaun nia misaun no vizaun, inklui nia responsabilidade atu proteje saúde públika no hametin konfiansa konsumidór sira.
Liuhosi prosesu revizaun no konsultasaun ne’e, BTL, E.P kontinua hametin koordenasaun entre jestaun no ekipa tékniku sira, no garante katak monitorizasaun kualidade bee, hadi’a operasaun no planeamentu infraestrutura bazeia ba evidénsia no konsidera protesaun saúde públika.
Fornese bee ne’ebé seguru no ho kualidade la’ós de’it responsabilidade operasionál nian, maibé nu’udár parte sentrál hosi BTL, E.P nia misaun atu fornese servisu bee ho kualidade ba povu Timor-Leste (TL).
Rekorda katak, tuir Dekretu-Lei N.º 31/2020 kona-bá Kontrolu Kualidade Bee ba Konsumu Umanu, entidade jestora (BTL, E.P) iha obrigasaun, atu prepara no submete Programa Kontrolu Kualidade Bee (PCQA) anuál nian ba entidade reguladora to’o loron 30 fulan setembru, hodi hetan avaliasaun no aprovasaun.
Share on Social Media:
