Díli, 23/02/2023, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Eng. Carlos Peloi dos Reis hamutuk ho I Vise-Prezidente KE BTL, E.P, Sr. Gustavo da Cruz akompaña Diretór DOM no ekipa enkontru ho parseiru JICA no TO BTL, E.P, iha sala reuniaun edifísiu sentrál BTL, E.P, Caicoli.
Objetivu hosi enkontru ne’e, hodi relata rezultadu treinamentu ou formasaun nian durante sira nia partisipasaun treinamentu iha Jakarta no Japaun ba Ezekutivu BTL, E.P nian. Atu haree sira nia koñesimentu ne’e to’o iha ne’ebé, atu nune’e sira bele aplika fali iha terrenu.
Durante iha enkontru ne’e, formandu Jakarta no Japaun nian (TO no Water Supply SO&M Officer) halo aprezentasaun ba atividade no esperiénsia sira iha espesialidade oin-oin ne’ebé sira hetan iha treinamentu refere nomos TO sira rekomenda mos atu atualiza ou haree material sira ne’ebé mak bele utiliza hodi halo servisu sira liga ba Sistema bee iha terrenu.
Hafoin aprezentasaun, Ezekutivu sira agradese ba parseiru JICA ne’ebé apoia ona hodi fasilita TO sira bá tuir treinamentu iha diaspora. No Ezekutivu sira mos husu ba TO ne’ebé hetan ona esperiénsia durante iha treinamentu ne’e, atu aplika fila-fali iha sira nia servisu lor-loron nian iha terrenu. Alende ne’e, liga ba rekomendasaun sira kona-bá materiál hirak ne’ebé hodi suporta servisu diária iha terrenu, Prezidente husu ba Diretór no Jestór atu tau iha planu, hodi halo rekizasaun nune’e bele sosa mateál sira ne’e. Alende ne’e, solisita TO sira atu observa Sistema bee ne’ebé eziste mak la funsiona ou aat, hodi hadi’a tuir koñesimentu ne’ebé sira hetan ona.
Parte JICA mos husu ba TO sira katak, esperiénsia ou koñesimentu ne’ebé sira hetan, atu tau iha asaun ou presiza prátika iha sira nia terrenu.
Enkuantu treinamentu ne’e, hala’o iha Bekasi, Jakarta, Indonézia no TO sira fahe ba grupu rua. Ekipa dahuluk nian tuir treinamentu kona-bá operasaun no manutensaun ba sistema bomba, ekipa daruak nian, tuir formasaun kona-bá área kanalizasaun no manutensaun ba kanu distribuisaun no transmisaun no seluk tan. Alende ne’e, inklui mos Water Supply SO&M Officer ne’ebé bá tuir treinamentu iha Japaun, kona-bá Non-Revenue Water Management (Leakage Control).
Share on Social Media:
