Díli, 23/01/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis, ho I Vise-Prezidente K.E BTL, E.P, Sr. Gustavo da Cruz, akompaña hosi Ofisiál Saneamentu O&M, lansa atividade limpeza ba drenajen sira iha kapitál Díli.
Lansamentu ne’e, hodi traballadór sira hahú halo limpeza ba drenajen ou valeta sira ne’ebé BTL, E.P rasik identifika ona intupidu, iha kapitál Díli, wainhira iha tempu udan. Limpeza ne’e ho intensaun atu evita inundasaun iha kapitál Díli no hamoos fatin hirak ne’ebé bee nalihun ba, nune’e bele evita susuk labele tolun ba iha fatin hirak ne’e, hodi prevene moras dengue ou labele fó impkatu ba komunidade sira nia saúde, liu-liu ba labarik sira.
Molok tun ba terrenu, hodi hahú atividade limpeza ne’e, Ezekutivu BTL, E.P husu ba traballadór sira, atu servisu ho kuidadu, katak tenke tau atensaun ba seguransa pesoál iha terrenu, tanba ne’e traballadór sira presiza utiliza ekipamentu protesaun pesoál ne’ebé iha, ho di’ak no seguru, nune’e bele bele asegura traballadór sira nia aan hosi risku, durante hala’o servisu iha terrenu iha terrenu.
Entretantu BTL, E.P kontrata kompañia Nelces Unipesoal Lda, hodi hamoos sedimentasaun iha valeta ne’e, ho durasaun tempu fulan lima no fundus ba projetu limpeza drenajen iha kapitál Dili ho montante $ 249,983.72. Enkuantu traballadór ne’ebé ohin hahú hala’o atividade limpeza ne’e, hamutuk nain 50 inklui Enjeñeiru, Jestór no Supervisor hosi kompañia refere no akompaña mos hosi Ofisiál Saneamentu O&M BTL, E.P nian.
Alende ne’e, drenajen ne’ebé BTL, E.P identifika iha kapitál Díli ne’e, fahe ba kategoria haat, hanesan dahuluk nian mak mota, hanesan mota Maloa no seluk tan, daruak mak kanál ou valeta ida ne’ebé liga direta ba mota (valeta boot), datoluk nian mak kanál hirak ne’ebé eziste iha bairo ida-idak maibé liga ba valeta boot estrada nian no kategoria dahaat nian mak valeta kiik sira iha komunidade sira nia uma hun ou besik komunidade sira nia hela fatin.
Enkuantu valeta kiik hirak ne’ebé besik komunidade sira nia hela fatin ne’e, traballadór sira sei la bá hamoos, ho razaun besik iha komunidade sira nia rezidénsia, tanba ne’e, responsabilidade komunidade ida-idak nian, ho nune’e traballadór sira sei hamoos ou kobre de’it, iha kategoria dahuluk to’o datoluk nian.
Entretantu traballadór sira ne’ebé ohin hahú limpeza ne’e, fahe ba grupu tolu no hamoos iha fatin tolu, hanesan iha parte Sionál, valeta D1 no D2, grupu daruak hamoos iha área Bemori to’o iha Villa Verde, mak iha valeta D4 no grupu ida seluk hamoos área Akadiru-hun to’o mota Bidau Santana, mak valeta D7. Tuir kontratu traballadór sira sei hala’o atividade limpeza hahú hosi segunda-feira to’o domingo.
Share on Social Media:
