Díli, 04/10/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis akompaña hosi I Vise-Prezidente K.E BTL, E.P, Dr. Gustavo da Cruz, enkontru ho ekipa hosi Ministériu Planu no Ordenamentu (MPO), iha Prezidente nia knaar fatin, edifísiu sentrál BTL, E.P Caicoli, Díli.
Objetivu hosi reuniaun ne’e, hodi halo koordenasaun entre MPO ho instituisaun benefisiáriu liu-liu BTL, E.P hanesan Ezekutivu BTL, E.P nian, presiza nafatin iha komunikasaun, hodi fó ideia komum sira ne’ebé governu halo ona ho EIB kona-bá Project Preparation & Implementation Program (PPIP) liu-liu kona-bá setór bee no saneamentu ba munisípiu Aileu, Ermera, Liquiça, Ainaro, Covalima no Bobonaro.
Diretór Nasionál Planu Spatial & PPIP-EIB-GoTL Focal Point, Sr. Kassius Klei Ximenes hatete, reuniaun koordenasaun ne’e, hodi ko’alia kona-bá asuntu tékniku balun ne’ebé presiza deskute kle’an ho BTL, E.P ne’ebé mak sai benefisiáriu ou sai na’in ba atividade refere.
“Asuntu ida ami halo koordenasaun ne’e relasiona ho atividade PPIP. No PPIP ne’e ita hetan apoia asisténsia téknika hosi European Investment Bank (EIB) no atividade refere asina iha 19 de agostu 2019, atividade ne’e foka ba iha setór tolu, primeiru mak bee no saneamentu, entaun nia benefisiáriu mak Ministériu Obras Públikas (MOP) liu-liu mak ba iha BTL, E.P, segundu mak rezíduo sólidu integradu no terseiru mak agroflorestál. Atividade ne’e, asina iha tinan 2019 no formal quick of meeting iha tinan 2021, daudaun ne’e to’o ona iha faze Project Steering Committee Meeting nian ba dala tolu ona no aposta los ona ba estudu pré-viabilidade ba viabilidade. Entaun iha asuntu balun presiza duni halo diskusaun ho BTL, E.P tamba asuntu ne’e presiza liu iha parte estudu mais profunda ba estudu viabilidade, entaun asuntu balun bele apar, tamba asuntu ne’e relasiona ho kooperasaun liu-liu iha fontes finanseiru, entaun mai halo diskusaun ne’e atu asenta asuntu tékniku sira depois ba iha futuru, desizaun ruma ba iha investimentu, ida ne’e ba Ministériu Finansas (MF) mak sei deside”, dehan Diretór Nasionál Planu Spatial & PPIP-EIB-GoTL Focal Point.
Diretór Nasionál Planu Spatial & PPIP-EIB-GoTL Focal Point akresenta, kona-bá projetu bee no saneamentu ne’ebé sei implementa ba munisípiu neen ne’ebé mensiona iha leten katak, tuir EIB nian prosesu, sei iha área estudu pré-viabilidade nian, ne’ebé daudaun ne’e, konsultór sira kuaze atu finaliza ona relatóriu finál ba planu mestre nian, hafoin hodi prepara ba faze sira tuir mai.
“Implementasaun sei iha área ida iha EIB nia prosesu iha sira-nia TOR ne’ebé ko’alia kona-bá estudu pré-viabilidade no viabilidade, entaun iha estudu pré-vialibidade maibé hosi parte governu nian, governu finansia ona ba iha planu mestre ba iha sidade neen hanesan iha parte Aileu, Gleno/Ermera, Liquiça konsultór sira kuaze atu finaliza ona sira-nia relatóriu finál ba planu mestre nian, ba parte Ainaro, Covalima no Bobonaro nian mos konsultór sira kuaze atu finaliza ona relatóriu finál ba planu mestre, hodi hakat ba dezeñu detalladu (DED), entaun komunikasaun sira ne’ebé iha ne’e, progresu atividade planu mestre hirak ne’ebé iha BTL, .EP mak sempre partilla ho COWI hanesan konsultór sira ne’ebé hetan fiar hosi EIB hodi halo atividade konsultoria iha Timor ba tinan tolu, agora sira iha pré, entaun sira mos identifika iha asuntu balun presiza sira atu asenta ba iha asisténsia téknika ne’e”, hatete Sr. Kassius Klei Ximenes.
Parte BTL, E.P ho MPO nafatin iha hanoin ida de’it no kompreensaun mútuo ho ideia koletivu, hodi atende ba kooperasaun hirak ne’ebé hosi fontes finanseiru internasionál sira ne’ebé fó asisténsia ba Timor-Leste (TL).
Enkuantu atividade ne’e, asina iha tinan 2019 foka liu ba setór tolu, hanesan Bee no Saneamentu, Rezíduo Sólidu Integradu no Agroflorestál.
Share on Social Media:
