Díli, 01/02/2023, Ekipa hosi Diresaun Enjeñaria no Investimentu (DEI), Bee Timor-Leste, Empreza Públika (BTL, E.P), halo monitorizasaun ba Emergency Project for Water Drilling Works in Capital Dili, liu-liu servisu Hamoos Perfurasaun ne’ebé lokaliza iha Comoro C 1, suku Comoro, postu-administrativu Dom Aleixo, munisípiu Díli.
Objetivu hosi monitorizasaun ne’e, hodi observa direta no atu hatene klaru progresu servisu fíziku ne’ebé la’o hela iha terrenu no nune’e bele garante kualidade projetu ne’e rasik.
Projetu fíziku daudaun ne’e, atinji ona pursentu 20 (20%). Enkuantu projetu refere wainhira finaliza, sei reforsa bomba ne’ebé eziste iha Comoro C, hodi fornese bee ba komunidade sira iha área Comoro, Golgota, Tasi-Tolu no fatin sira seluk. Alende ne'e, hafoin finaliza tiha perfurasaun iha Comoro C 1 mak foin kontinua fali halo perfurasaun bee iha fatin haat seluk hanesan Comoro C 2, Comoro F (Fomento), Bidau Masaur, Becora (Camea Cendana) nomos flushing no pump test iha Bairo-Pité.
Enkuantu Projetu Emerjénsia ba Servisu Perfurasaun Bee iha Kapitál Díli (Emergency Project for Water Drilling Works in Capital Dili) ne’e, projetu pakote ida, ne’ebé kompostu hosi perfurasaun iha Comoro C 1, Comoro C 2, Comoro F (Fomento), Bidau Masaur, Becora (Camea Cendana) no flushing no pump test iha Bairo-Pité, tanba ne’e kompañia sei halo perfurasaun iha fatin lima no flushing & pump test iha fatin ida.
Enkuantu orsamentu ba pakote projetu emerjénsia ne’e (Emergency Project for Water Drilling Works in Capital Dili) ne’e, mai hosi Fundus Infraestrutura ho montante $ 258,534.23 no ezekuta hosi kompañia Alifa Pereira Unipessoal Lda ho durasaun tempu ba projetu ne’e fulan neen.
Share on Social Media:
