Covalima, 17/12/2022, Ekipa Bee Timor-Leste, Empreza Públika (BTL, E.P) Nasionál akompaña hosi tékniku BTL, E.P munisípiu Covalima, halo levantamentu dadus tékniku foun ba rekursu no sistema bee, hodi kanaliza bee ba komunidade sira, iha postu-administrativu Maukatar, munisípiu Covalima.
Atividade levantamentu dadus ne’e, hala’o durante loron lima, hahú hosi loron 12 to’o loron 16 fulan dezembru tinan ne’e, ho objetivu hodi haree direta bee matan no akumula dadus sira hotu, nune’e mos, atividade levantamentu ne’e, hodi hatene débitu bee iha fatin refere, nune’e planu ba futuru, hodi utiliza rekursu bee ne’e, atu kanaliza ba komunidade sira, iha P.A Maukatar.
Normalmente antes atu hakat ba ba nia implementasaun, ekipa DEI sei halo uluk análize hidrólika, halo dezeñu no prepara mos BoQ inklui faze sira seluk, mak foin haka tba faze implementasaun.
Molok tun ba terrenu hodi foti dadus, ekipa D.E.I BTL, E.P halo uluk enkontru koordenasaun h oho Administradór P.A Maukatar inklui lideransa komunitária sira seluk no autoridade lokál sira mos apresia tebes ba planu ou programa BTL, E.P nian kona-bá kanalizasaun bee moos, hodi hatan ba populasaun sira-nia preokupasaun durante ne’e.
Durante iha atividade levantamentu dadus ne’e, akompaña mos hosi komunidade, katuas lia na’in sira inklui joven balun. Enkuantu sistema bee ne’ebé sei fornese ba komunidade sira iha futuru, maka sei muda ou transforma ba sistema urbana, hodi instala ou monta mos metru kontadór ba komunidade sira nia hela fatin.
Hafoin atividade levantamentu dadus remata, ekipa DEI kontinua halo verifikasaun detalla ba fatin hodi hatuur ou instala tanke no lokál dada liña transmisaun no distribuisaun nian, iha P.A Fatumea, munisípiu Covalima.
Alende ne’e, hosi verifikasaun ba lokál instalasaun Sistema ne’e, atu nune’e iha futuru, wainhira iha prosesu tenderizasaun no implementasaun labele hetan impedimentu hosi komunidade sira iha fatin refere.
Share on Social Media:
