Ekipa D.O.M Sosializa Informasaun kona- Díli, 27/06/2022. Diretór Diresaun Operasaun no Manutensaun hamutuk ho ekipa hala’o sosializasaun kona-ba selu tarefa bee , regras sira oinsa atu rejistu, hodi halo ligasaun bee moos foun ba komunidade sira nia hela fatin, ne’ebé realiza iha Suku Fatuhada, iha área Lurumata. Ekipa BTL, E.P liu husi D.O.M sosializa informasaun ne’e, atu fasilita komunidade sira hodi intende, ho nune’e komunidade sira bele mai halo registu iha edifísiu BTL, E.P. Uainhira komunidade iha inisiativa mai registu ona iha BTL, E.P, ne’e konsidera sai ona kliente, ho nune’e maka tékniku husi D.O.M, sei ba halo ligasaun bee moos foun ba komunidade ne’ebé rezistradu ona ne’e nia uma. Aléin ne’e, liu husi atividade sosializasaun ne’e, bele esplika mós informasaun relasiona ho servisu BTL, E.P nian, nune’e ekipa tékniku sira tun ba terrenu, hodi halo melloramentu, no komunidade sira, bele kolabora. Iha oportunidade ne’e, Xefe Aldeia Zero III no Xefe Aldeia Zero V, ne’ebé maka partisipa mós iha sosializasaun ne’e, esperasa mós sentiment ne’ebé ho kontente no konsidera atividade ne’e, importante tebes, tamba bee moos nu’udar nesesidade bazíku ba ema nia moris. Tamba ne’e, autoridade lokál aldeia rua ne’e, kompromete katak, uainhira tékniku sira halo servisu iha área refere, sei organiza povu di’ak liu tan, nune’e bele garante servisu la’o ho di’ak. Iha parte seluk, autoridade seguransa, Ofisiais Polisia Suku ( OPS ) hato’o mós katak, prontu atu akompaña servisu sira ne’e, hodi asegura nafatin atividade iha terrenu, nune’e labele iha impedimentu ruma iha implementasaun servisu nian. Antes ne’e ekipa D.O.M hala’o ona sosializasaun iha Aldeia Zero I, ne’ebé pertense ba Suku fatuhada, Postu Administrativu Dom Aleixo.
Share on Social Media:
