Díli, 29/09/2022. Diretór Operasaun no Manutensaun no ekipa hamutuk ho JICA hala’o enkontru ho Administradór do Postu Dom Aleixo no mós Autoridade lokál sira. Enkontru ida ne’e hala’o iha edifísiu Administrasaun Postu Administrativu Dom Aleixo, Fatuhada.
Ekipa Operasaun no Manutensaun BTL, E.P ho parseiru JICA, hasoru malu ho autoridade sira, atu kordena servisu, tamba dadaun ne’e ekipa tékniku BTL, E.P, servisu hela iha terrenu hanesan iha área Fomento II no tuir planu sei halo melloramentu sistema bee moos iha Aldeia Ramelau iha tempu badak ne’e.
Ekipa halo aproximasaun ida ne’e, atu fo koñesimentu ba autoridade sira, nune’e ekipa tékniku tun ba baze, labele hetan intervensaun ruma husi komunidade sira.
Administadór Postu Dom Aleixo hatete, nu’udar autoridade maxímu iha postu ne’e, prontu kolabora, no hatete mós katak importante maka komunika ba malu, uainhira hahu implementa servisu.
Administradór Postu ne’e mós relata problema, liu-liu komunidade balun asesu bee, utiliza nafatin Bomba Bee (Sanyo) no mós halo Ligasaun Ilegál, ne’ebé kontribui reduz presaun bee, Tamba ne'e Administadór husu ekipa tékniku BTL, E.P, atu bele halo intervensaun imediatu.
Iha Oportunidade ne’e Xefe Suku no Xefe Aldeia sira hato’o mós sira hanoin kona-ba programa Governu nian, atu hadi’a sistema bee moos, no prontu kolabora hodi bele lori bee hakbesik liu tan ba komunidade sira.
Iha fatin hanesan segundu komandante PNTL eskuadra Dom Aleixo afirma, nu’udar autoridade seguransa, firme apoiu hodi fo seguransa ba atividade, ne’ebé iha interese ba komum no liu-liu ba populasaun, tamba ne’e parte seguransa garante katak, joven ka komunidade balun sei la halo intervensaun ruma, uainhira ekipa tékniku sira atu mellora sistema bee moos.
Segundu Komandante ne’e mós informa ba ekipa BTL, E.P, tun ba terrenu mak identifika pessoál Polisia balun, halo ligasaun ilegál, ekipa bele taka uluk mak sira nian.
Diretór Operasaun no Manutensaun, agradese ba Adiministradór ho autoridade lokál no mós parte seguransa, ne’ebé iha vontade apoia malu, servisu iha terrenu, hodi labele mosu dezentedimentu, maibé bele garante sistuasaun la’o kontroladu.
Ekipa operasaun no manutensaun sei halo intervensaun, konsentra iha área zona 2, mak hanesan Suku Bebonuk, Fatuhada, Maleuana, Ai mutin, Kampu Alor no seluk seluk tan.
Share on Social Media:
