Ermera, 19/08/2022, Ekipa Diresaun Enjeñaria no Investimentu (D.E.I) nasionál BTL, E.P, akompaña hosi Tékniku Operadór (T.O) munisípiu Ermera no Autoridade Lokál sira, foti dadus tékniku iha Bee Matan ka intake Bobtelo, ne'ebé lokaliza iha postu-administrativu Hatolia A nomos Bee Matan rua, hanesan Bee Matan Maubuti-Maet, iha suku Fatubolu no Bee Matan Suir Tling, iha suku Fatubessi, postu-administrativu Hatolia B, munisípiu Ermera.
Atividade levantamentu dadus tékniku ne’e, hala’o durante loron tolu, hahú hosi loron 17 to’o loron 19 fulan agostu tinan ne’e, ho objetivu atu hatene débitu bee iha bee matan ne'e, molok implementa projetu bee moos, iha postu-administrativu rua ne'e.
Molok tun ba terrenu, ekipa D.E.I BTL, E.P hala’o uluk reuniaun ho Administradór postu-administrativu Hatolia A no Hatolia B no durante iha reunaiun ne’e, hetan rezultadu di’ak tamba Administradór sira prontu koopera hodi servisu hamutuk ho BTL, E.P.
“Antes bá terrenu ami hala’o uluk enkontru ho Administradór nain rua no sira mós prontu koopera ho ita (BTL, E.P)”, dehan Tékniku D.E.I BTL, E.P nasionál.
Tuir informasaun hosi ekipa D.E.I katak, hafoin levantamentu tékniku, mak foin halo planu no dezeñu ba projetu kona-bá sistema bee moos refere.
Share on Social Media:
