Bobonaro,18/08/2022. Ekipa Bee Timor-Leste, Empreza Públika (BTL, E.P) liuhosi Diresaun Operasionál no Manutensaun (D.O.M), hamutuk ho ekipa husi Departamentu Apoiu Kliente (D.A.K), no Jurista BTL, E.P hala’o sosializasaun ba komunidade no entidade sira hosi instituisaun relevante, iha munisípiu Bobonaro.
Objetivu hosi sosializasaun ne’e, atu divulga lei no regras haat hosi BTL,E.P, nu’udár mata dalan ida, atu bele regula konsumidór sira, hanesan Dekreitu Lei númeru 4/2020 de 25 Setembru kona-bá kriasaun BTL,E.P, Dekreitu Lei númeru 4/2004 de 11 fevereiru, ne’ebé aprova rejime fornesimentu bee ba konsumu públiku, Diploma Ministeriál númeru 1/2009 de 5 outubru kona-bá fiskalizasaun sistema abastesimentu bee no Diploma Ministeriál númeru 1/2004 de 11 de fevereiro, kona-bá Tabela Tarifária.
Diretór Operasionál no Manutensaun, Sr. João Nazaret da Piadade Brás hatete, atividade sosializasaun ne’e, importante nune’e bele partilla Dekretu Lei no Regras ba konsumidór sira, atu labele prátika halo ligasaun ilegál no labele utiliza mákina sira hodi supa bee.
Sekretáriu Autoridade munisípiu Bobonaro, João do Carmo de Fátima, konsidera sosializasaun ne’e importante tebes, tamba bele fahe ona enkuadramentu legál sira, ba kliente konsumu bee moos, iha munisípiu ne’e rasik.
Nia hatutan, hanesan autoridade sei halo kopersaun servisu di’ak ho BTL, E.P, nune’e konsumidór sira bele kontribui selu tarifa ba BTL, E.P, hodi halo manutensaun ba sistema bee moos, atu bele garante nafatin nia sustentabilidade ba tempu naruk.
Entretantu dadauk ne’e, komunidade sira ne’ebé konsege asesu ba sistema bee moos, husi kanalizasaun BTL, E.P ne’e, pursentu sanulu resin tolu (13 %) no abitante sira ne’ebé seidauk asesu bee moos ne’e mak pursentu walu nulu resin hitu (87%).
Komunidade sira ho pursentu walu nulu resin hitu (87%), seidauk asesu bee moos hosi sistema, tamba kanu barak la funsiona, maibé ekipa destakadu iha munisípiu refere, kontinua mellora sistema bee moos, hodi bele reponde ba komunidade sira-nia nesesidade loron-loron.
Share on Social Media:
