Manatuto, 09/01/2023, Ekipa konjunta Bee Timor-Leste, Empreza Públika (BTL, E.P), munisípiu Manatuto, kompostu hosi Tékniku Operadór (TO) no Apoiu Kliente tun ba terrenu, hodi lee metru kontadór ne’ebé instala ona iha kliente sira nia hela fatin, restaurante nomos iha edifísiu Estadu balun iha área zona 4, postu-administrativu Manatuto Villa, munisípiu Manatuto.
Tuir informasaun hosi Terrenu katak, hafoin lee tiha metru kontadór, ekipa BTL, E.P informa ba kliente sira hodi ba selu tarifa bee iha balkaun ou edifísiu BTL, E.P, iha munisípiu refere. maibé mook kliente sira atu ba selu, ekipa BTL, E.P sei sura totál osan bazeia ba uzu bee lor-loron nian, hafoin mak sei kliente sira sei selu tarifa bee ne’e.
Entretantu tuir dadus atuál total kliente iha munisípiu Manatuto ne’ebé halo ona ligasaun foun hamutuk 1.387, hosi númeru ne’e, kliente iha ona metru kontadór hamutuk 1.309 no kliente sira ne’ebé seidauk iha metru kontadór hamutuk 123. Enkuantu metru kontadór hirak ne’ebé instala ou monta ona iha kliente sira nia hela fatin, hanesan iha restaurante no edifísiu públiku nomos iha komunidade nia hela fatin, iha munisípiu Manatuto. Atividade lee metru kontadór ne’e, aban sei kontinua no bele to’o loron tolu ou lima.
Tuir regras kliente sira ne’ebé asesu ona kanalizasaun bee hosi BTL, E.P, iha obrigasaun hodi selu tarifa bee moos, atu nune’e bele kontribui reseitas ba kofre Estadu nomos hodi garante kustu ba nesesidade operasaun no manutensaun sistema bee moos.
Share on Social Media:
