Manufahi, 12/09/2023. Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) akompaña hosi ekipa BTL, E.P munisípiu Manufahi halo levantamentu dadus tékniku ba rekursu bee iha suku Betano, postu-administrativu Same, munisípiu Manufahi.
Atividade levantamentu dadus ne’e, hodi observa direta rekursu no sistema bee ne’ebé eziste iha suku refere, nune’e ekipa hodi halo análize no dezeñu, hodi halo preparasaun atu mellora no kanaliza bee ba Betano.
Enkuantu obra perfurasaun sistema bee iha Betano ne'e, implementa hosi parte Institutu Petróleu no Jeolojia Institutu Públiku (IPG, I.P, sigla portugés) hafoin finaliza servisu perfurasaun entrega ona sistema ne'e mai BTL, E.P hodi jere, tanba ne'e, iha loron 12 fulan ne'e, ekipa BTL, E.P foin halo levantamentu dadus tékniku, nune'e hodi hakat ba faze tuir mai.
Durante iha terrenu, ekipa BTL, E.P observa direta fatin perfurasaun sistema bee nian nomos lokál ne’ebé hodi hatuur tanke rezervatóriu bee moos, ne’ebé lokaliza iha suku Betano. Iha atividade survey ne’e, akompanña mos hosi autoridade lokál sira. Alende ne'e, ekipa BTL, E.P ko'alia mos ho lideransa komunitária sira kona-bá kestaun sosiál nian, wainhira iha faze implementasaun projetu.
Share on Social Media:
