Viqueque, 10/10/2022, Ekipa Bee Timor-Leste, Empreza Públika (BTL, E.P) munisípiu Viqueque hamutuk ho traballadór mão de obra hakotu ou dezliga koneksaun bee ilegál neen iha komunidade sira-nia hela fatin, iha Zona Lamak-Laran, ne’ebé lokaliza iha suku Caraubalo, postu-administrativu Viqueque Villa, munisípiu Viqueque.
Hafoin dezliga koneksaun ilegál ne’e, tékniku BTL, E.P informa ba komunidade sira ne’ebé komete aktu koneksaun ilegál ne’e, atu ba rejista nune’e tékniku sira bele liga fila-fali sira-nia bee ho nune’e komunidade sira mos konkorda no promote katak, sira sei ba rejista iha edifísiu no halo pagamentu, nune’e BTL, E.P sei dada hikas sira-nia bee ba sira nia uma inklui instala mos metru kontadór.
BTL, E.P nafatin fó hanoin ba públiku katak, hahalok koneksaun ilegál ne’e kontra Dekretu Lei nú. 4/2002 loron 11 fulan Fevereiru ne’ebé ko’alia kona-bá Aprova Rejime Fahe Bee ba Públiku.
Alende ne’e, hafoin hakotu koneksaun ilegál tékniku sira mos kontinua halo servisu hodi instala metru kontadór unidade hitu ba komunidade sira-nia hela fatin, iha Zona Lamak-Laran, suku Caraubalo, Viqueque.
Tékniku ho traballadór ba instala metru kontadór bee ba konsumidór sira-nia uma ne’e, tamba konsumidór hirak ne’e, antes ne’e rejista no halo ona pagamentu hodi sai kliente BTL, E.P nian.
Alende ne’e, instalasaun metru kontadór ne’e, hodi hafasil tékniku halo kontrolu ba bee no hatene mos nesesidade ba uzu bee lor-loron nian, wainhira to’o tempu atu selu tarifa, fásil atu hatene nia presu ou valór ba kustu bee ne’e rasik. Ho nune’e ba kliente ne’ebé uza barak liu sei selu kustu tuir nesesidade uzu nian, tamba ne’e wainhira laiha nesesidade atu uza bee, sujere atu taka metru kontadór no labele loke husik bee sulin estraga, nune’e bele hamenus gastu no iha parte seluk mos, wainhira laiha nesesidade hodi uza bee tenke taka atu nune’e labele hamenus presaun bee.
Share on Social Media:
