.jpeg)
Ermera, 22/07/2022, Ekipa BTL, E.P munisípiu Ermera horseik loron 21 fulan ne’e, simu audiénsia no hala’o enkontru ho ekipa husi Planu Munisipál Ordenamentu Territoriál (PMOT) no Banku Dezenvolvimentu Aziátiku (ADB, sigla inglés).
Objetivu husi sorumutu ne’e, hodi ko’alia kona-bá Sistema Bee Urbanu no Bee Rurál, ne’ebé integra iha PMOT nian. entretantu enkontru ne’e rasik, realiza iha loron 21/07/2022 horseik, iha edifísiu BTL, E.P munisípiu Ermera.
Iha enkontru ne’e, parte PMOT husi gabinete Ministériu Planu no Ordenamentu (MPO) husu ba BTL, E.P munisípiu Ermera, atu aprezenta dadus jerál kona-bá bee moos nian ba PMOT.
Hafoin enkontru ekipa PMOT no ADB akompaña husi BTL, E.P Ermera kontinua kedas hala’o vizita no hodi observa direta tanke kaptasaun Mota Boot ne’ebé lokaliza iha aldeia Borhei, suku Humboe nomos vizita Estasaun Tratamentu Água (ETA) Riheu, iha aldeia Gomhei, suku Riheu nomos tanke rezervatóriu Humboe.
Tuir informasaun husi Koordenadór Interinu BTL, E.P munisípiu Ermera katak, hafoin termina enkontru no vizita ba fatin sistema bee moos hirak ne’e, BTL, E.P Ermera entrega kedas dadus ba PMOT.
Share on Social Media:
