Baucau, 16/01/2023, Ekipa Bee Timor-Leste, Empreza Públika (BTL, E.P) munisípiu Baucau, kompostu hosi Tékniku Operadór (TO) no Estajiáriu hosi Sentru Formasaun Carlos Gamba Fatumaca, hetan tuda hosi komunidade balun, iha área Bugate parte estrada kraik, munisípiu Baucau.
Tuir informasaun hosi BTL, E.P Baucau, problema ne’e akontese, iha tuku 16:50 otl, iha ne’ebé ekipa BTL, E.P hamutuk ho Estajiáriu sira hala’o hela servisu normalizasaun ba koneksaun ilegál 20 iha terenu, nune’e ikus mai rezulta Estajiáriu ida nia liman bubu, tanba hetan tuda hosi komunidade balun, iha área refere.
Komunidade ida ne’ebé halo asaun hasoru ekipa BTL, E.P ho Estajiáriu sira ne’e, mak durante ne’e halo koneksaun bee ho ilegalmente, nune’e tékniku sira identifika hodi normaliza ligasaun ilegál ne’e, maibé komunidade sira ne’e la koopera hodi halo asaun hasoru ekipa BTL, E.P ho Estajiáriu sira. Maibé hafoin mosu problema ekipa BTL, E.P hato’o kedas ba parte seguransa (PNTL) konsege detein kedas suspeitu iha sela polísia durante oras 72 no vítima rasik, parte seguransa (PNTL) Baucau lori kedas ba ospitál referénsia Baucau hodi hetan tratamentu imediatu no tuir rezultadu katak, vítima nia kondisaun la grave no tuir informasaun hosi Baucau, kondisaun vítima hahú rekupera ona, alende ne'e, ohin suspeitu nia família mos husu ona deskulpa ba BTL, E.P no Vítima Estajiáriu ne’e no sei rezolve tuir dalan família nian.
Enkuantu koneksaun bee ilegál ne’ebé komete hosi uma kain 20 iha Bugate parte estrada kraik ne’e, tékniku sira konsege normaliza ona no balun seidauk, maibé iha tempu badak sei normaliza hotu koneksaun illegal hirak ne’e, atu nune’e labele prejudika presaun bee, hodi ema hotu-hotu bele hetan bele.
Entretantu koneksaun ilegál ne’e kontra regras BTL, E.P nian, tanba bazeia ba Diploma Ministeriál nú. 4/2004 de 11 de Fevereiro, artigu 27 nú 1, alinea e, ne’ebé ko’alia kona-bá labele uza mákina ou sanyo hodi liga ilegalmente ba kanu transmisaun no distribuisaun bee. Nomos Diploma Ministeriál nú. 4/2004 de 11 de Fevereiro, iha artigu 14 nú. 1 alinea d sita mos kona-bá ligasaun ilegál.
Regras hirak ne’e, bandu atu ema labele halo ligasaun bee ho ilegalmente, tantu liuhosi uza mákina ou sanyo nomos fura ku’ak kanu transmisaun no distribuisaun nian, tamba aktu hirak ne’e, kontribui hamenus presaun bee, nune’e bee la sufisiente ba ema hotu.
Tanba ne’e, BTL, E.P nafatin husu ba komunidade sira atu koopera, hodi labele prátika bebeik aktu koneksaun bee ho ilegálmente, atu nune’e bee bele to’o ba ema ou ema hot-hotu bele asesu bee hanesan.
Share on Social Media:
