Liquiça, 17/10/2022, Relasiona ho informasaun nomos video balun hosi Autoridade munisípiu Liquiça katak, deskonfia iha ema deskoñesidu balun ne'ebé laiha konsiénsia bá haris iha Estasaun Tratamentu Água (WTP, sigla inglés), Sarlema Liquiça, nune’e Administradór Munisípiu Liquiça kontaktu direta mai Diretór hosi Diresaun Operasionál no Manutensaun (D.O.M) hodi haree kestaun ne’e.
Hafoin simu informasaun husi Administradór Munisípiu Liquiça, Diretór no tékniku D.O.M dezloka kedas ba munisípiu Liquiça, hodi konfirma kona-bá problema refere.
Molok tun ba terrenu, hodi observa direta WTP Sarlema, ekipa D.O.M akompaña hosi Koordenadór BTL, E.P munisípiu Liquiça hala’o uluk enkontru ho Administradór Munisípiu Liquiça (AML) ho ekipa, iha edifísiu Administrasaun Munisípiu Liquiça (AML). Durante iha enkontru ne’e, Administradór informa no esplika kona-bá kestaun ne’e no autoridade ne’e hato’o mos komunidade sira-nia preokupasaun kona-bá falta bee moos ne’e.
Hafoin enkontru, Diretór D.O.M no Administradór Liquiça ho ekipa hamutuk ho Koordenadór BTL, E.P Liquiça no tékniku dezloka kedas ba WTP Sarlema hodi haree ou observa direta kondisaun iha fatin ne’e.
Durante vizita iha WTP Sarlema, Koordenadór BTL, E.P rekoñese, ema asesu livre ba WTP ne’e, tamba laiha seguransa nomos moru protesaun aat ou hetan sobu hosi ema deskoñesidu inklui estraga mos kuadru naran (papan nama) BTL, E.P nian, ne'ebé tékniku sira harii iha WTP ne’e rasik, maibé iha tempu badak sei rezolve kestaun ne’e, atu nune’e bele evita ema labele tama no sai livre iha WTP refere. Alende ne’e, Diretór D.O.M mos orienta kedas Koordenadór BTL, E.P Liquiça atu emprega traballadór mão de obra, hodi fó seguransa iha WTP Sarlema no bee ulun E-Ana Loa no Da-Ulu nomos sei hadi’a hikas moru protesaun iha WTP refere.
Koordenadór BTL, E.P akresenta dalaruma bee maran, tamba rekursu bee ne’ebé utiliza hodi kanaliza ba WTP Sarlema hodi fornese ba komunidade sira ne’e, Sistema bee gravitasaun, nune’e tempu udan, mota boot hodi estraga bee ulun, nune’e rai henek nakonu, hodi hamosu intupidu, nune’e difikulta fornesimentu bee ba komunidade sira, maibé bee matan ne’e mos, wainhira iha tempu bailoro bee laiha ou maran, nune’e labele distribui bee ba komunidade, maibé kona-bá kanalizasaun bee hosi sistema perfurasaun laiha problema.
Entretantu komunidade hirak ne’ebé durante ne’e asesu bee hosi WTP Sarlema mak aldeia Leopa ne’ebé kompostu hosi bairo lubuk ida, hanesan Kalora, Kalosa, Pikpak, Kakas-Laran no bairo seluk.
Enkuantu iha munisípiu Liquiça, liu-liu iha sistema urbana, ne’ebé daudaun ne’e BTL, E.P kobre mak iha suku tolu, hanesan suku Dato, Maumeta no Laohata.
Molok remata, iha biban ne'e, tékniku BTL, E.P hosi nasionál sukat kedas uma seguransa nian nomos moru protesaun iha WTP, hodi bele hadi'a.
Share on Social Media:
