Díli, 18/11/2022, Ekipa Bee Timor-Leste, Empreza Públika (BTL, E.P) kompostu hosi Diretór Diresaun Enjeñaria no Investimentu (DEI) Sr. Aleixo dos Santos, Jestór Infraestrutura, ekipa hosi Diresaun Operasaun no Manutensaun (DOM) no Project Manager Unit (PMU), hamutuk ho ekipa hosi DFAT/PARTISIPA, hala’o vizita ba projetu melloramentu sistema bee moos emerjénsia, (Dili Water System Emergency Repair Project-DWSERP) sesaun I no sesaun II, iha Tohumeta no Mutudare.
Durante iha vizita ne’e mos, DFAT entrega xave téknikamente ba BTL, E.P ne’ebé reprezenta hosi Diretór DEI, no entrega fila-fali ba tékniku operadór Zona 3 ne’ebé responsabiliza iha área refere, hodi halo operasaun ou jere sistema bee moos ne’e, hodi fornese bee ba komunidade sira, iha kapitál Díli.
Objetivu hosi vizita ne’e, hodi observa diretamente projetu fíziku ne’ebé remata ona no iha biban ne’e mos parte DFAT/PARTISIPA hatudu no esplika oinsá atu opera no halo jestaun ba sistema refere, nune’e tékniku operadór sira bele hatene no hahú halo operasaun, hodi distribui bee ba komunidade sira iha Díli.
Projetu fíziku iha Tohumeta finaliza ona no ohin entrega ona xave téknikamente ba tékniku operadór BTL, E.P nian, hodi halo operasaun ba sistema refere, nune’e bele apoia sistema ezistente sira, hodi garante abastesimentu bee ba komunidade sira.
Enkuantu projetu melloramentu sistema bee moos emerjénsia iha Mutudare, daudaun ne’e nia obra fíziku la’o hela iha terrenu no tuir planu sei finaliza iha fulan Dezembru tinan ne’e, nune’e projetu melloramentu sesaun I no II (Tohumeta no Mutudare) sei entrega ofisialmente ba BTL, E.P iha fulan oin tinan 2022, atu nune’e BTL, E.P bele jere rasik sistema ne’e inklui manutensaun.
Entretantu projetu refere, finansia hosi Governu Austrália, liuhosi parseiru DFAT/PARTISIPA ho montante Dollar Australianu millaun 6 no implementa hosi kompañia implementadór RMS ne’ebé superviziona hosi (Engineers Without Borders-EWB).
Share on Social Media:
