Díli, 30/09/2022, Atu garante traballadór sira-nia saúde no seguransa iha terrenu, Ofisiál Saúde no Seguransa hosi Departamentu Kontrolu Kualidade no Ambiente (DCQA, sigla portugés) Bee Timor-Leste, Empreza Públika (BTL, E.P), Sr. Paulino Maria Dias, fó treinamentu ba Koordenadór BTL, E.P munisípiu sira, kona-bá saúde, seguransa no ambiente. No treinamentu ne’e realiza iha salaun enkontru edifísiu sentrál BTL, E.P Caicoli.
Objetivu husi treinamentu ne’e, hodi fó koñesimentu kona-bá Saúde, Seguransa no ambiente nomos partilla informasaun kona-bá oinsa atu utiliza Ekipamentu Protesaun Pesoál (PPE, sigla inglés) ne’e, atu bele fó seguransa ba traballadór sira no labele prejudika ou fó risku ba traballadór sira-nia aan rasik, durante hala’o servisu iha terrenu.
Ofisiál Saúde no Seguransa BTL, E.P hatete, treinamentu ida ne’e esensiál tebes, hodi kontinua partilla informasaun ba koordenadór munisípiu sira, tamba sira mak tau matan ba tékniku sira, oinsá atu asegura tékniku sira-nia seguransa pesoál, durante hala’o servisu iha terrenu.
“Treinamentu ida ne’e, tama ba faze datoluk nian, ne’ebé ohin ita fó treinamentu ba koordenadór no koordenadora munisípiu sira, atu habelár liu tan informasaun kona-bá saúde seguransa nian ba sira, liu-liu sira hanesan koordenadór no koordenadora, sira mak tenke tau matanba tékniku sira, oinsá atu asegura sira-nia servisu ho di’ak no seguru iha terrenu. Treinamentu ohin, ita foka ba pontu importante tolu, hanesan regulamentu internu BTL, E.P nian kona-bá saúde, seguransa no ambiente, oinsá kria ambiente ne’ebé seguru, saudável no produtividade”, dehan Ofisiál Saúde no Seguransa BTL, E.P.
Koordenadora BTL, E.P munisípiu Baucau, Adriana Belo da Rosa ne’ebé partisipa iha treinamentu ne’e konsidera, treinamentu ne’e esensiál ba traballadór sira, oinsá bele iha koñesimentu, hodi utiliza ekipamentu protesaun hirak ne’e, hodi bele asegura tékniku sira-nia seguransa pesoál durante iha terrenu.
“Ha’u sente treinamentu PEE ida ne’e, importante tebes ba ita-nia servisu, hanesan tratamentu direta ba iha servisu tékniku nian, tamba ne’e importante tebes, tamba ida ne’e atu asegura ba ema, sasan nomos ba ambiente hotu. No materiál PPE ida ne’e mos importante tebes presiza atu kompleta liu atu ita bele hala’o servisu ho seguru no bele kontrola saúde ho di’ak”, dehan Koordenadora BTL, E.P Baucau.
Hafoin termina treinamentu, parte DCQA entrega mos Ekipamentu Protesaun Pesoál ba Koordenadór munisípiu sira nomos ba tékniku sira no parte DCQA mos husu ba tékniku sira, wainhira hala’o servisu iha terrenu, tenke utiliza PPE ne’ebé mak fornese ona, uza ho kuidadu, hodi proteje sira-nia aan hosi risku DCQA mos husu ba Koordenadora no Koordenadór sira atu tau matan nafatin ba tékniku sira no wainhira akontese asidente ruma iha terrenu presiza informa imediata, nune’e bele aranja métodu ne’ebé mak adekuadu, hodi responde lalais ba asidente hirak ne’e.
Tuir planu parte DCQA sei kontinua fó treinamentu ba tékniku munisípiu sira ne’ebé seidauk partisipa iha treinamentu refere.
Share on Social Media:
