Díli, 08/08/2022, Atu garante traballadór sira-nia saúde no seguransa pesoál nafatin seguru iha terrenu, ohin loron 8 fulan Agostu tinan 2022 ne'e, Ofisiál Saúde no Seguransa BTL, E.P, husi Departamentu Kontrolu Kualidade no Ambiente (DCQA, sigla portugés), Sr. Paulino Maria Dias akompaña husi Jestór DCQA BTL, E.P, Sr. Hipólito Amaral Ximenes, fó treinamentu ba Koordenadór Zona 1 to’o 11 ne’ebé estabelesidu iha kapitál Díli inklui tékniku operadór no leitór sira, kona-bá saúde, seguransa no ambiente. Nune’e mos atividade treinamentu ne’e rasik realiza iha salaun enkontru, edifísiu sentrál BTL, E.P, Caicoli, Díli.
Objetivu husi treinamentu ne’e, hodi fó koñesimentu ba traballadór sira kona-bá Saúde, Seguransa no Ambiente nomos partilla informasaun kona-bá oinsa atu utiliza Ekipamentu Protesaun Pesoál (PPE, sigla inglés) ne’e, atu bele fó seguransa ba traballadór sira no labele prejudika ou fó risku ba traballadór sira-nia aan rasik durante hala’o servisu iha terrenu.
Ofisiál Saúde no Seguransa BTL, E.P hatete, treinamentu ida ne’e importante tamba hanesan programa ida, atu kompleta polítika kona-bá saúde no seguransa ne’ebé mak aprovadu husi ezekutivu BTL, E.P nian, hodi kontinua alastra informasaun ba traballadór sira, liu-liu ba tékniku operadór sira nomos tékniku sira seluk, atu kuidadu saúde wainhira hala’o servisu iha terrenu.
“Treinamentu ne’e, atu fó koñesimentu ba ita nia traballadór sira ne’ebé mak durante ne’e servisu iha terrenu, informasaun ida ne’e sai hanesan kanál ida ne’ebé importante atu bele asegura sira-nia servisu liu-liu sira ne’ebé mak hala’o servisu hanesan fíziku hodi kontinua kuidadu sira-nia saúde, no asegura katak sira nia servisu ne’e bele la’o ho seguru no labele hetan asidente ba sira-nia aan rasik”, dehan Ofisiál Saúde no Seguransa BTL, E.P
Iha biban ne’e, Tékniku Operadór no nudár mos Leitór ne’ebé partisipa iha treinamentu sente kontente tamba bele hetan informasaun detalla kona-bá saúde, seguransa no ambiente nian nomos bele simu ona PPE hodi asegura ou proteje traballadór sira nia-aan husi risku, liu-liu tékniku sira ne’ebé hala’o servisu iha terrenu, tamba tékniku sira servisu lor-loron iha risku nia laran, ho nune’e presiza tau atensaun alende ne’e, tékniku ne’e mos, rekomenda ba parte DCQA, atu nafatin fó treinamentu ou kapasitasaun ba tékniku sira ne’ebé mak seidauk partisipa nomos alende fó treinamentu presiza mos halo aproximasaun ba tékniku sira, liga ho utilizasaun PPE ne’e rasik.
Hafoin remata treinamentu, parte DCQA fahe mos Ekipamentu Protesaun Pesoál ba Koordenadór no tékniku sira, no parte DCQA mos husu ba tékniku sira atu utiliza PPE ne’e ho kuidadu, hodi proteje sira-nia aan, wainhira hala’o servisu iha terrenu.
Tuir planu parte DCQA sei kontinua fó treinamentu ba tékniku sira ne’ebé seidauk partisipa inklui Koordenadór, Koordenadora tékniku operadór no leitór sira ne’ebé destakadu iha munisípiu sira.
Share on Social Media:
