Ermera, 27/09/2022. Ekipa Tékniku ou Enjeñeiru hosi Diresaun Enjeñaria no Investimentu (D.E.I) Bee Timor-Leste, Empreza Públika (BTL, E.P), akompaña hosi Xefe Dezenvolvimentu suku, xefe suku no aldeia, hamutuk ho kompañia sira ne’ebé partisipa iha prosesu tenderizasaun, hala’o site visit ba Projetu Melloramentu Sistema Bee Moos no mós liña transmisaun no distribuisaun bee nian, iha postu-administrativu Atsabe, munisípiu Ermera.
Atividade site visit ba projetu melloramentu sistema bee ne’e, durante loron ida ho objetivu hodi lori kompañia 22 ne’ebé partisipa iha prosesu tenderizasaun ba projetu refere, ba vizita no observa direta lokál bee matan Ergina, aleinde ne’e, esplika mós dezeñu no hatudu fatin sira ne’ebé hodi dada liña transmisaun no distribuisaun bee nian, atu nune’e, kompañia sira bele hatene ona fatin hirak ne’e, uainhira sira manan iha prosesu tenderizasaun ne’e, sira bele implementa tuir dezeñu ne’ebé mak ekipa BTL, E.P esplika no hatudu ona ba sira.
Molok tun ba terrenu, hodi hahú atividade site visit ne’e, ekipa D.E.I BTL, E.P ho kompañia sira hala’o uluk enkontru ho autoridade Postu-administrativu Atsabe no lideransa suku sira, hodi halo koordenasaun no introduz mos projetu sistema bee moos ne’ebé sei implementa iha fatin ne’e ba autoridade lokál sira.
Durante enkontru, Administradór postu-administrativu Atsabe, Constâncio da Silva hatete, sira prontu koopera hodi servisu hamutuk ho kompañia sira, uainhira kompañia hirak ne’ebé mak manan, hodi implementa ba projetu refere.
“Ida ne’e hanesan iha faze ida, atu bá haree lokál ou fatin projetu nian, nune’e sei laiha difikuldade ou problema, tékniku sira sei lori ita boot sira ba haree bee matan no tuir mai sei to’o iha tenderizasaun, wainhira kompañia ida ne’ebé mak manan, ami hein de’it karta rekoñesimentu katak kompañia ida ne’e mak sei implementa projetu ne’e, iha fatin ne’e, ami prontu atu servisu hamutuk ho kompañia sira no laiha impedimentu ruma”, dehan Administradór Atsabe.
Autoridade lokál sira apresia no prontu, atu koopera iha parte sosiál nian, hodi garante implementasaun projetu ne’e to’o remata ho di’ak, wainhira hakat ba faze implementasaun nian.
Entretantu Projetu Melloramentu Sistema Bee Moos ne’e, sei benefisia ba komunidade sira iha suku haat, hanesan suku Parami, Laclo, Baboe Kraik no Malabe.
Share on Social Media:
