Ermera, 28/09/2022, Ekipa Tékniku ou Enjeñeiru hosi Diresaun Enjeñaria no Investimentu (D.E.I) (T.O) Bee Timor-Leste, Empreza Públika (BTL, E.P), akompaña hosi fasilitadór postu-administrativu Atsabe hamutuk ho kompañia sira ne’ebé partisipa iha prosesu tenderizasaun, hala’o site visit ba Konstrusaun Tanke BPT/Distribuisaun ba Projetu Sistema Bee Moos Ergina ne’ebé sei implementa iha postu-administrativu Atsabe, munisípiu Ermera.
Atividade site visit kona-bá Konstrusaun Tanke BPT/Distribuisaun ba Projetu Sistema Bee Moos Ergina ne’e, durante loron ida ho objetivu hodi lori kompañia 13 ne’ebé partisipa iha prosesu tenderizasaun ba projetu refere, ba vizita no observa direta lokál konstrusaun tanke BPT/Distribuisaun bee ba projetu bee matan Ergina esplika dezeñu, atu nune’e, kompañia sira bele hatene ona fatin hirak ne’e, wainhira sira manan iha prosesu tenderizasaun ne’e, sira bele implementa tuir dezeñu ne’ebé mak ekipa BTL, E.P esplika no hatudu ona ba kompañia sira.
Molok tun ba terrenu, hodi hahú atividade site visit ne’e, ekipa D.E.I BTL, E.P ho kompañia sira hala’o uluk enkontru ho autoridade Postu-administrativu Atsabe no lideransa suku sira, hodi halo koordenasaun no introduz mos projetu konstrusaun tanke rezervatóriu ne’ebé sei implementa iha fatin ne’e ba autoridade lokál sira.
Durante iha enkontru ne’e, Administradór postu-administrativu Atsabe, Constâncio da Silva hatete, sira prontu hodi servisu hamutuk ho kompañia sira, wainhira kompañia hirak ne’ebé mak manan, hodi implementa ba projetu refere.
“Ohin ita boot sira atu haree fatin hodi halo konstrusaun tanke no ninia konstrusaun ne’e atu halo oinsá, ida ne’e sei simu orientasaun hosi tékniku sira, hafoin mak sei liu ba prosesu sira tuir mai, ami iha ne’e hein, kompañia ida ne’e mak liu, atu mai hahú konstrusaun, ami prontu simu ita boot sira, tamba ida ne’e projetu ida ba nesesidade komunidade nian, tamba ne’e laiha razaun atu lakohi simu ita boot sira nia prezensa”, dehan Administradór Atsabe.
Autoridade lokál sira apresia no prontu, atu koopera iha parte sosiál nian, hodi garante implementasaun projetu konstrusaun tanke ne’e to’o remata ho di’ak, wainhira hakat ba faze implementasaun nian.
Molok termina, Administradór postu-administrativu Atsabe mos rekomenda ba BTL, E.P atu kria ou estabelese regra ruma hodi regula, wainhira sistema bee ne’e prontu no entrega ona ba komunidade sira iha postu refere, atu nune’e komunidade sira labele sobu sistema bee ne’ebé mak instala ona, tamba antes ne’e, iha ona instalasaun sistema bee balun maibé to’o ikus iha komunidade balun sobu no estraga tiha sistema hirak ne’e.
Share on Social Media:
