Baucau, 05/10/2023. Vise-Prezidente Komisaun Ezekutiva (KE)Bee Timor-Leste, Empreza Públika (BTL, EP) ba Asuntu Sistema Bee, Saneamentu no Drenajen Sr. Gustavo da Cruz akompaña hosi Diretór DEI, Koordenadora BTL, EP Munisípiu Baucau ho ekipa partisipa iha sorumutu mediasaun ba desentendimentu bee matan entre komunidade Uaibitai Leten no Uaibitai Kraik, iha postu-administrativu Quelicai, munisípiu Baucau.
Objetivu hosi sorumutu ne’e, hodi rezolve ou harmoniza hikas desentendimentu entre parte rua, ne’ebé falta liña koordenasaun, hodi impede projetu fíziku iha terrenu.
Ho desentendimentu ne’e, horseik Prezidente Autoridade Munisípiu Baucau lidera sorumutu ida, ne’ebé inklui mos hosi parte hotu hanesan, Administradór postu-administrativu Quelicai no Baguia, Komandante PNTL Munisípiu Baucau, Komandante PNTL Eskuadra Baguia no Quelicai, Xefe suku Haeconi/Baguia, Xefe suku Letemutu/Quelicai, reprezentante komunidade reklamante ou nudár na’in ba bee matan, Sr. Afonso Diretora kompañia Nautetu no Jatono, abitante ou nudár na’in ba bee matan ne’ebé aseita hodi dada bee hosi bee matan ne’e, Sr. Jacinto nomos BTL, E.P rasik, hodi solusiona desentendimentu refere, nune’e bele hahú fila-fali projetu fíziku.
Durante iha enkontru ne’e, parte rua hato’o sira nia razaun nomos esklaresimentu relasiona ho kestaun ne’e. No finalmente iha ona solusaun ba desentendimentu refere. ho nune’e, komunidade sira oferese fila-fali bee matan Uaibitai ne’e, hodi kanaliza bee ba kapitál postu-administrativu Quelicai.
Enkuantu projetu kanalizasaun bee iha postu-administrativu Quelicai ne’e, sei benefisia ba komunidade 1000-resin, uma kain 300-resin no sei fornese mos bee ba fasilidade públika sira hanesan, eskola, igreja, postu saúde no edifísiu públiku sira seluk ne’ebé eziste iha kapitál postu-administrativu refere.
Share on Social Media:
