𝐃𝐢́𝐥𝐢, 𝟏𝟕 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, akompaña hosi Diretór DEI, João da Cruz Cardoso no Jestór RP & GIS hamutuk ho Diretór/a no tékniku sira hosi liña Ministeriál relevante sira seluk, inklui empreza Tsuneishi Timor Shipbuilding Unip, Lda hala’o survey inísiu ba fatin ne’ebé sei estabelese ou konstrui infraestrutura bázika sira hanesan bee, estrada no eletrisidade, iha Postu-administrativu Laleia, Munisípiu Manatuto.
Planu ba konstrusaun infraestrutura bázika hirak ne’e, atu apoia ou fasilita empreza Tsuneishi Timor Shipbuilding Unip, Lda, hodi implementa projetu konstrusaun estaleiru, iha PA Laleia.
Molok hala’o survey ba terrenu, ekipa konjunta ne’ebé lideradu hosi Ministériu Planeamentu no Investimentu Estratéjiku (MPIE) hasoru malu uluk ho Administradór Postu-administrativu Laleia, hodi informa no koordena kona-bá prezensa ekipa nian iha Postu refere, hafoin kontinua hala’o vizita ba fatin hirak ne’ebé identifikadu ona.
Hafoin survey ne’e, tékniku hosi liña Ministeriál ida-idak, sei prepara no halo levantamentu téknika detalla, nune’e hodi aprezenta ba Ministru MPIE, atu bele ajenda ba CAFI, hodi deskute no hetan aprovasaun, molok hakat ba faze tuir mai.
Ekipa konjunta ne’ebé ohin hala’o survey iha Laleia, kompostu hosi MPIE, MOP, BTL, E.P, Terras no Propriedades, EDTL, E.P, TradeInvest no empreza Tsuneishi Timor Shipbuilding.
Share on Social Media:
