Díli, 01/08/2025, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith akompaña hosi Diretór O&M, Aleixo dos Santos, Jestór DAK ho ekipa BTL, E.P sosializa Dekretu Lei no Diploma Ministeriál, ba abitante sira iha aldeia Efaca, suku Manleuana, postu-administrativu Dom Aleixo, munisípiu Díli.
Iha atividade sosializasaun ne’e, BTL, E.P partilla detalla informasaun ba abitante sira, liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”. Atu nune’e abitante sira bele entende didi’ak regras BTL, E.P nian, liu-liu kona-bá oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun.
Objetivu hosi realizasaun atividade sosializasaun ne’e, hodi esplika uluk regulamentu sira nomos kritéria oinsá atu sai kliente BTL, E.P nian ba abitante sira, molok tékniku BTL, E.P tun ba halo servisu melloramentu ba sistema kanalizasaun bee iha aldeia Efaca.
Vise-Prezidente KE BTL, E.P ba Asuntu Tékniku hatete, BTL, E.P realiza uluk sorumutu ne’e, hodi hato’o uluk informasaun no hetan konkordánsia hosi komunidade sira, molok tékniku sira tun mai halo melloramentu ba sistema kanalizasaun bee iha fatin refere. Tanba ne’e, husu autoriedade lokál no komunidade sira-nia apoia, atu servisu hamutuk ho tékniku BTL, E.P nian, perante hala’o obra fíziku iha terrenu.
Xefe aldeia Efaca husu ba abitante sira ne’ebé partisipa iha atividade sosializasaun ne’e, atu fahe mos informasaun hirak ne’e ba populasaun sira seluk ne’ebé ohin la marka prezensa iha sosializasaun ne’e nomos solisita atu kolabora parte BTL, E.P, wainhira tékniku sira tun mai halo servisu iha sira-nia aldeia.
Durante iha atividade sosializasaun ne'e, komunidade aldeia Efaca hato’o mos sira-nia sujestaun no preokupasaun ne’ebé sira enfrenta durante ne’e, liu-liu kona-bá problema bee moos.
Relativamente ba preokupasaun sira, Diretór O&M hatete, BTL, E.P anota sujestaun no preokupasaun sira ne’ebé ohin hato’o no atu hatan ba problema hirak ne'e, iha tempu badak, ekipa BTL, E.P sei tun mai iha aldeia ne’e, hodi mellora sistema kanalizasaun ezistente sira, nune'e bele dada bee ba konsumidor sira.
Partisipa iha atividade diseminasaun ne’e, reprezentante Administradór Postu-Administrativu Dom Aleixo, xefe aldeia nomos abitante aldeia Efaca.
Share on Social Media:
