Manatuto, 25/02/2024. Iha semana kotuk, tékniku hosi Departmentu Infraestrutura, Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) halo monitorizasaun ba projetu Pakote Supply & Installation of Prefabricated Liner Tank ne’ebé implementa hela iha postu-administrativu Laclubar, munisípiu Manatuto.
Monitorizasaun ne'e, hodi observa direta obra fíziku ne'ebé la'o hela iha terrenu no atu hatene progresu servisu ne'e rasik, nomos hodi garante kualidade projetu refere, nune'e wainhira finaliza, benefisiáriu sira bele uza ba tempu naruk.
Hafoin observasaun obra fíziku iha terrenu, Enjeñeru DEI relata, bazeia ba rezultadu monitorizasaun nian, daudaun ne'e, projetu fíziku kona-bá Pakote Supply & Installation of Prefabricated Liner Tank iha Laclubar, atinji ona pursentu 74.39 (74.39%). No projetu refere ezekuta hosi kompañia Twins2 Unipessoal Lda, ho durasaun fulan neen, maibé bele estende wainhira iha razaun ne'ebé razoável hanesan kondisaun klima ne'ebé mak la permite atu halo servisu iha terrenu. Alen de ne'e, BTL, E.P mos nafatin koordena ho kompañia implementadór no husu ba sira, atu bele finaliza lalais obra ne’e. No fundus ne’ebé gasta ba projetu refere, ho totál $ 188,035.32.
Enkuantu projetu ne'e, instala mos tanke rezervatóriu hamutuk haat, ho diferensa kapasidade hanesan 120m3, 100m3, 76m3 no 55m3 no instala iha zona ida-idak ne'ebé identifika ona hosi ekipa RP-GIS. Tanke rezervatóriu hirak ne'e wainhira finaliza, sei akumula bee hodi fornese ba benefisiáriu sira, tantu kliente doméstika nomos repartisaun Estadu sira iha postu-administrativu Laclubar.
Share on Social Media:
